مقرة جماعية تم اكتشافها بريف درعا
ترديد الشعار الثلاثي المؤلف من اهداف البعث و شعارو ، و المسبّة المعلّبة لجماعة الاخوان المسلمين في ساحة المدرسة كان بمثابة ساعة الصفر اللي بيبدا الطليعي فيها نهارو..
أمة عربية واحدة، ذات رسالة خالدة..
اللي بيقرأ اهداف البعث و المتمثّلة بتوحيد الامّة العربية بيقول انو هوّة بحضرة آلهة الأحزاب..
بس الطريق الى توحيد الامّة شائك ، و بحاجة لإزالة الكثير من العوائق للوصول الها ، و ايمان البعثي بالنظرية القائلة انو الغاية تبرر الوسيلة ، دعاه الى تسوية الارض السورية استعداداً للوحدة الكبرى..
فنراه كيف عزّز الخلاف الثقافي و الاجتماعي بين اهل دمشق من هم داخل السور و من خارجو عن طريق دعم من هم داخل السور بمشاريع إنمائية و بالتالي أعطاءهم شعور التفوّق ، و اغفال حق من هم خارج السور و بالتالي تزويدهم بشعور الكره..
كما منشوفوا كيف فخّخ العلاقة بين اهل مدينة حلب و ريفها ، عن طريق إهمال اهل الريف عمداً لاستمرار حاجتهم للعمل في مصانع اهل المدينة ، و بالتالي تعميق مفهوم عنجهية صاحب المعمل و حاجة العامل الو..
زرع ألغام على حدود السويدا و درعا ، و همس بإدن الدرزي انو البدوي بدّو يقتلك، و أرسل رسالة للبدوي انو الدرعاوي أتحالف مع الدرزي ضدك، و قال علنا للدرعاوي انو انت الدولة ، و الدولة انت ، و اكبر موظفينا من حورانك، فلا تخلّي هالصغار الدروز و البدو يكبروا راسهون ، هنن مسؤوليتك..
و شدد على أهمية فكرة عدم عودة العلويين في اللاذقية الى عهد الخدم في بيوت المسلمين ، و همس لأهل السنة انو اللاذقية اتغيّرت و ما بقا انتو اللاعب الأساسي فيها، و للمسيحيين قال انو السنة رح ياكلوكون و العلويين رح يحموكون، و للعلويين قال لا تعطوهون الأمان للمسحيين ، بيقلبوا عليكم بأول فرصة..
و لعرب الشمال خبرهون انو الأكراد بعبع، و أرسل للأكراد انو العرب متحالفين مع الأتراك لتهجيرهون..
و قال للحمصي انو الحموي ما بيحبّك..
و للطرطوسي انو الكل ما بيطيقك..
و للادلبي انو ما حدا شايفك..
و للادقاني انو الكل مستوطي حيطك..
و النتيجة كانت انو قتلنا الناطور السوري و ما حصلنا على العنب العربي..
فالعراق و لبنان صارو تلاتة ، و ليبيا اربعا ، و اليمن اتنين ، و طهران محتلة اربع عواصم ، و اسرائيل ضابّة الخامسة ..
اما بالنسبة للبعث :
صامد ٌيا بعث صامد، انت في ساح النضال..
وحّد الأحرار هيا، وحّد الشعب العظيم ..
و امضي يا بعث قويا، لِغَد حر كريم..
