انتصر بقتل الخوف في قلوبنا نصراً مبيناً و إلهياً ، فكانت هزيمتو اللي ما رح يقوم منها بحياتو

اكتر من ٤٤٠٠ فطيسة اسدية خلال شهرين ، و النظام و اعلام النظام و أدوات النظام عم تحكي بالانتصارات في تحرير قرية نائية هنا و حاجز تم استردادوا هناك..
و كأنو هالنظام ما بيعرف الهزيمة أبداً..
و كلمة الانتصار ملازمة لسانو بكل حالات الهزائم المنكرة اللي اتعرضلها على طول مسيرتو النضالية.
سنة ٧٣ خسر الجولان نهائيا و طلع عم يصفق لانتصار استعادة شوية أراضي من القنيطرة..
سنة ٨٢ اتدمّر سلاح طيرانو في سما بيروت و طلع علينا معلناً انتصار ساحق على إسرائيل بحجة صمود جيش المشاة ..
سنة ٩١ خسر سياسياً لبنان و سلّمها للسعودية بعد الطائف و خرج علينا عم يزلغط للانتصار الجديد و تشريع منطق الطائفية القذرة..
سنة ٩٨ خسر الإسكندرون بكل خسّة بعد تحشيد الجيش التركي و طلعو علينا انو من الأساس الإسكندرون رايحة و رايحة فان لم تكن انتصار فهيّة بدون شك ليست هزيمة ..
سنة ٢٠٠٥ انطرد من لبنان و خرج مذلول من ثكنات العاصمة و ضواحيها بس اعتبروه انتصار بعد مليونيات ” شكرًا سوريا الاسد “..
سنة ٢٠٠٦ اتدمّرت لبنان فوق راس أهلها نتيجة تصرّف أرعن لقائد ميليشا المقاومة التابعة للفرقة الرابعة و اعتبرو صمود أهالي لبنان في القصير انتصار ، و نصر الهي فوق منها..
سنة ٢٠١٣ سلّم بكل وضاعة سلاح الجيش الاستراتيجي و اللي مكلفنا مليارات الدولارات و اعتبرو مجرد بقاء الاسد بالقصر هوة الانتصار بحد ذاتو..
بس للتاريخ ، و منشان ما حدا يوصفنا إننا مجحفين بحق هالنظام و عم انشوّه الوقائع.. النظام انتصر بمعركة وحدة فقط خلال كل مسيرتو النضالية ، و مع ذلك اعتبرها هزيمة :
سنة ٢٠١١ انتصر بقتل الخوف في قلوبنا نصراً مبيناً و إلهياً ، فكانت هزيمتو اللي ما رح يقوم منها بحياتو..