انا خايف على حاضري من نفاقك

بزمانها أوبرا وينفري عملت حلقة خاصة بتحكي عن أنجح شخصيات سود بأميركا..حلقة لاقت نجاح كبير و حضور هائل من المجتمع الملون الاميركي..
اتخيلت يومها، لو انو لاري كينغ الأبيض عمل نفس الحلقة و لكن لأنجح شخصيات بيض باميركا، إيه كانت الدنيا قامت و قعدت عليه و اتهموه بالعنصرية و ما كان خلص من الانتقاد ، و كيف يا لاري بتعمل هيك ؟؟؟ و كيف يا لاري ما بتراعي ابناء اللون الاخر ، و من هالقصص اللي ما الها لا لون و لا طعمة..
راقبت من كم يوم اجتماع لزعماء كنائس المشرق في العاصمة الأميركية واشنطن ، هالاجتماع اللي جمع كل الأقطاب المسيحية المشرقية من رتبة بطرك الى رتبة مرمطون و ما بينهما..
و الهدف المعلن من الاجتماع كان حماية المسيحيين في الشرق ، اما الهدف الحقيقي هوّة حماية نظام بشار الاسد من السقوط على ايدي المتوحشين آكلي لحوم البشر يا ماما..
و للأمانة لازم قول أنّو انبرت مجموعة من إخوانا المسحيين المقيمين في اميركا و حاربوا اعمال المؤتمر الخبيث من داخل جدران المؤتمر و خارجها..
على كل حال..
تذكّرت أوبرا وينفري و حلقتها المميزة عن السود المتفوقين ، و تخيلت هالمرّة لو ان اجتماع للمسلمين انعقد في احد العواصم ، و اجتمع أئمة العالم الاسلامي من الكبير للصغير و ما بينهما ، و الهدف من الاجتماع لا كان لحماية المسلمين ، و لا لتمييز المسلمين ، و لا عن تخصيص المسلمين .
بل كان الاجتماع لنفترض بهدف حماية أنثى الثعلب في فترة خصوبتها مو اكتر من هيك ابداً..
ايه كانت الدنيا قامت و قعدت عالمسلمين، و اهتزت الدنيا بالمناشير الرافضة لهيك تجمّع تحت آسم إسلامي ، و انطرشت صفحات الفيسبوك من دعاة العلمانية ببوستات بتحكي عن إقصاء المسلمين لغيرهون حتى في حماية امن الغابات، و امتلئت صفحات الجرايد عالصفحات الاولى بمانشيت موحّد :
” طائفية المسلمين تحتكر حماية أنثى الثعلب “
ولك استحوا بقا على كبرتكون و اخجلوا ممن تدعون تمثيلهم ، جايين من ورا جدران كنائسكون اللي حافظ عليها المسلمين اكتر من المسيحيين انفسهم و عم تطالبوا بحماية مين من مين؟؟؟
اذا بدكون بشار الاسد رئيس عليكون، اعملو مؤتمر تحت اسم حماية الاسد ، و انسولي حكاية حماية المسيحيين و المؤتمرات المنعقدة منشانها..
لانو اذا بدنا نحكي بالمشرمحي نيافتك :
اذا انت خايف على مستقبلك من شراكتي، ايه انا خايف على حاضري من نفاقك..