بعد ست شهور من انطلاق الثورة السورية المجيدة و تماماً بتاريخ ١٨ أكتوبر ٢٠١١ ، صدر عن محكمة اللاذقية قرار بتلزيم أراضي الكورنيش الجنوبي في المدينة الى محمد مخلوف و عيلتو..
الاراضي اللي بتسوى مليارات الليرات و اللي كانوا بيت مخلوف عم يتسابقوا على أحقيّة السيطرة عليها و استثمارها مع دريد رفعت الاسد..
يومها أذكر انو دريد الاسد كتب غاضباً على صفحتو بالفيسبوك بوست بيتهّم فيها بيت مخلوف صراحةً بسرقة مال سوريا، و قامت يومها بالرد عليه كوكو أنجل ( الاسم الحركي لكندا مخلوف عالفيسبوك ) ، و وصفتو ببائع الدباديب و بالمطعمجي ..
رد عليها فوراً ابن رفعت متهماً شباب بيت المخلوف بنقص الرجولة ليتركوا بنتهون تقوم بالرد بالنيابة عنهون..
مبارح اشتغلت الصحافة الثورية و غيرها ببوست كتبو هالمعتوه دريد الاسد عن مشكلة صارت مع خلدون مخلوف ، و بدأت التحليلات السياسية على كلام هالاجدب ، و كترت التوقعات ، و راح البعض ابعد من هيك لمّا وصف كلام ابن رفعت بانّو اعتراف بفشل الدولة..
الموضوع يا جماعة ما بدّو تحليل الله يرد عنكون ..
المشكلة بين بيت مخلوف و بيت الاسد كانت و مازالت على محاصصة سوريا ، فلا يشط فكركون لبعيد..
مواضيع ذات صلة: الحرب الخفية بين حافظ الاسد واخوه رفعت وسر غرق السفينة الصينية
