المرأة مرأة سواء عربية او غربية وفعلاً مافي غير الله بيفهم تلافيف مخها

و منتفاجئ بس يقولوا : مافي غير الله بيفهم عالنسوان !!!!
بعتني الدكتور عالمخبر لحلل دم تحضيراً للعملية ، و اتصل وقلها بدي النتيجة باسرع وقت ممكن .. وصلت لعندها وانا صفراء و عايفة حالي بعد وجع اسبوعين و اذ بتقلي : شو لون شعرك ، حبيته ؟ افتكرتها عم تجاملني لترفع معنوياتي و قلتلها : شكراً
ربطتلي المطاطة فوق الوريد لتسحب دم و راحت جابت موبايلها فتحتلي عصورها وهي بالشعر الاحمر و الاصفر و الاسود و قالتلي: ايّ احلى .. افتكرتها عم تغير جو و قلتلها الاحمر وفجأة بتاخدني من ايدي عالحمام وبتشيل نضاراتها و بتشد شعري و بتحط خصلة عراسها قال لتشوف كم درجة تفتيح بدها لتوصل للون شعري .. طالعت موبايلي وصورتها ، قالتلي : رح اخسر شغلي اذا بيعرف الدكتور عم ضيع وقت ، قلتلها : هي مو للدكتور هي لفيسبوك عربي مع عنوان ( سيلفي و الخالصة خلفي ) كملي مقارنة شعر لقلك .. رجعنا عالغرفة و اخدت دم و هي لساتها عم تحكي عن شو لازم تخلط الوان ليطلع لون شعري .
قبل ما امشي قلتلها : ممكن شوف انبوبات الدم بس لاتأكد اذا اسمي عليهن لاني حاسة رح تخلطي انابيب وارجع لعندك لاعمل فحص جديد .
المرأة مرأة سواء عربية او غربية وفعلاً مافي غير الله بيفهم تلافيف مخها .