المحامي ميشال شماس: من احدى محادثاتي مع والدة معتقل

– مرحبا استاذ فيك تطلعلي ابني..وشو مابدك بعطيك؟
– لبش وين ابنك موجود..؟
– مابعرف اعتقلوه على حاجز القطيفة من شي سنتان..
-انا كمحامي عملي فقط في المحاكم .. لا يسمح لنا بمراجعة فروع الامن.
– طيب اذا عمتلك وكالة مافيك تعرف وينو وتطلعو.
– متل ما قلتك المحامي لا يفيدك في شيء سوى في تقديم الطلب وينتظر الجواب الذي غالبا لن يأتي.
بعد اسبوع :
– مرحبا استاذ تذكرتني انا حاكيتك ميشان ابني: اليوم شفت محامية في محكمة الارهاب وقالت انها بتطالع ابني من خلال معارفها..
– اهلين مدام اي تذكرتك .. وشو طلبت منك المحامية؟
– والله المحامية قال بدها بالاول دفعة 100الف ل.س لحتى تعرف وينه وشو وضعه وبعدين بتشوف اذا ممكن يطلع ولا لا..
– هاي محامية نصابة لا تصدقيها…
– والله محتارة يا استاذ صدقك ولا صدقها وبعدين ما فيني اترك ابني هيك.
– متل مابدك انا نصحتك.
بعد شهر من المحادثة الثانية:
– مرحبا استاذ تذكرتني انا ام محمد المحامية عرفت وين ابني وطلبت مني ادفع مبلغ خمسة ملايين ليرة حتى تطالعو من سجن صيدنايا قال رح تقدم طلب لرئيس محكمة الميدان لتخفيض حكم ابني.
– اي اهلين تذكرتك .. ما قلتلك هاي نصابة .. المحامي لايستطيع الاعتراض على احكام محكمة الميدان لان احكامها مبرمة.
– استاذ هي وعدتني وحسيت انها بتقدر تطالعوا .
– طيب اذا هيك وقبل ما تتورطي وتدفعي روحي قدمي طلب زيارة لابنك وشوفي اذا فعلا محكوم .. وحاكيني بعدها.
بعد اسبوع
– مرحبا استاذ انا ام محمد رحت على الشرطة العسكرية وقالوا لي انه موجود في سجن صيدنايا بس هلق ممنوع زيارته.. رجعي بعد شهر فيك تزوريه بيكون شافوا القاضي.
– شفني ماقلتك ان المحامية نصابة وعلى اساس انه محكوم. اشتكي على المحامية.
– والله يا استاذ الغريق بينعلق بقشة. وبعدين خوفوني قال ممكن تضره.
– شو بدها تضره اكتر مو هو مضرور.. لا تخافي وقدمي الشكوى. وبكل الاحوال خبريني شو بصير معك ولا تاخدي قرار قبل ما تسأليني وانا جاهز بخدمتك في اي وقت.

Follow @MufakerLiberal