الله يكسّر ايدي كيف خربت البلد

لا اريد لأحد ان يسكت عن الخطأ او يتستّر عليه..

هالفلسفة العميقة مو من عندي و حياتكون ، هيك قال المقبور البائد في ليلة مصالحة مع الذات و انتشرت هالمقولة متل النار بالهشيم..

و لأنو دريد الاسد بيحب عمّوا و بيحترم توصياتو، كتب مبارح عن الفساد و ما نتج عن الفساد في دولة الاسد ، و ربط الأنفاق المكتشفة في الغوطة بفساد بعض رجال الدولة، و علّل وجود البيئة الحاضنة للارهابيين بالعشوائيات اللي اتعمّرت بسبب غض نظر المفسدين، و لعن الفساد و حط أيدو مشكوراً على هالجرح العميق المتأصّل في المجتمع السوري و اللي كان السبب في الفوضى الحاصلة اليوم..

بس نسي او تناسى الدكتور ابن ابيه انو كل أركان الدولة الفاسدة هي من آل الاسد و الدائرة المقرّبة طائفيا من العيلة و اللي اتجنّب ذكرهون بحرف واحد، متناسياً وصية عمّو حافظ بعدم السكوت عن الخطأ ..

يا دريد افندي مو كان الأجدى فيك انو تسمّي الأشياء بأسماءها بدل الضحك على كوم الصراصير المصفقّين اللي على صفحتك!!!!

حافظ الاسد رئيس الجمهورية تلاتين سنة..
بشار الاسد رئيس الجمهورية ١٤ سنة..
رفعت الاسد نائب رئيس الجمهورية ٣٥ سنة..
كمال الاسد رئيس غرف التجارة ٣٠ سنة..
هلال الاسد مدير عام الإسكان العسكري ٢٠ سنة..
سامر الاسد مدير عام معامل الغزل و النسيج ١٥ سنة..
عماد الاسد مدير عام الجمارك تلاتين سنة..
رامي مخلوف رئيس مجلس ادارة سوريا عشرين سنة..
فواز الاسد حاكم اللاذقية تلاتين سنة..
ايمن جابر صهرك مدير عام المناطق الحرة عشرين سنة..
ايهم الاسد مسؤول ملف النفط السوري ١٥ سنة..
و اللائحة تطول بس ما الي خلق عد اكتر..

فتحتلك درجي يا دكتور لتحطّلي ٢٥ ليرة منشان ما اكتب هالبوست عن فساد عيلتك، بس كنت غبي و نسيان انك عم تحارب الفساد و المفسدين من أمثالي الله يكسّر ايدي كيف خربت البلد..