ما ان تنتهي الحرب في سوريا و ما ان يعود اللاجئين في لبنان الى قراهم و بلداتهم و بيوتهم ، حتى نشوف لبنان كيف رح يتحوّل و يصير..
سجّل عندك..
كهربا أربع و عشرين على أربع و عشرين و تصير بيروت و باقي المدن شعلة نور البركة..
فائض في مياه الشرب لدرجة السعي لبناء مسابح مليانة بمياه صنين المعدنية..
الزبالة من الاراضي رح تنشال و رح يعيدوا تدويرها و استخدامها في مفاعلهم النووي ذو الأغراض السلمية..
المخدرات رح تصير من التاريخ..
مزارع الحشيش رح تحترق و تتحول لمزارع توليب ..
السلاح اللي طارش البلد رح ينسحب و يتسلَّم للجهات المختصة ..
مهرجانات بعلبك رح تولع من جديد ..
السيّاح ما رح يلاقوا طاولات في الوسط التجاري ..
التلج رح يرجع و يغطِي فاريا و الأرز ، و موسم التزلُّج على مين يشتهي بس..
فيروز رح ترجع تغنّي حبيتك بالصيف بدل هالبهادل اللي عم تضطر تغنّيها هالأيام ..
الطوائف رح ترجع على بيوتها ..
الجيش ماشالله حولو رح ينتشر على حدود و مداخل البلد ..
الأمن حدّث و لا حرج..
برنامج لول رح يوقف و يرجع رياض شرارة ..
ابراهيم الأمين رح يسكت و نرجع نقرا للمعلوف..
الجنوب .. يا عيني عالجنوب.. رح تشوفوا كيف رح يندمج مع رؤية الدولة بدل الدويلة..
الشمال و البقاع رح يصيروا واحة من واحات المعرفة..
أمراء الحرب رح يختفي صوتهون ورا قضبان السجون ..
سلاح حزب الله رح ينضب بمستودعات الجيش اللبناني ..
رح نشوف الحقيقة و نعرف مين قتل رفيق الحريري..
رح نشوف المسيحي ساكن في قريطم، و السني عم يعمّر في الكسليك ، و الشيعي عندو حسينية في دير القمر ..
الله يسامحهون هاللاجئين .. انّو بقا يرجعوا لبلادهون و يخلّونا نسمع زكي ناصيف واقف على راس بيروت و عم يغنّي :
راجع راجع يتعمّر راجع لبنان .. راجع متحلّي و اخضر اكتر ما كان..
