الله يسامحك بس البرغل ماقريت عليه يمكن يكون مو حلال

اجا عبالي اعمل كبة اشتريت اللحمة و قعدت دور بالمنطقة كلها ما كنت لاقي فرامة لحمة .. و حوالي الساعة 8 المسا لقيت محل صغير فاتح جديد الآرمة تبعه مكتوبة بالفارسي ، قلت لحالي هاد هو هدول بيقولوا عنهن روافض مدري خوارج المهم مارح تفرق معه نوعية اللحمة .
اشتريت من عنده برغل و قلتله بدي استعمل ماكينتك ، طبعاً بعد طول شرح شو هيي الكبة التهى الزلمة بالكبة و بعتته يجبلي من جوا جاطات و نقعنا 6 كياس برغل وهو عم يزق بالمي السخنة و انا ناطرة بلاقيه سكر باب المحل لانه ممنوع يضل فاتح بعد الوقت و فجأة بيجي اللحام و بيروح هداك الرافضي المحترم .
حط البرغل و فرمهن و حط اللحمة مع البرغل و فرمها وشي ساعة لانه انا كونه بالعمر مرة لاعمل كبة ناتعة شي 10 كيلو ليكفوني مدى الحياة و هو عم يفرمهن وكل ما خلص دور قله هلق الدور الثاني و هكذا .
فجأة بيقلي من وين : قلتله سوريا و انت ؟
قلي : افغانستان
وهون ما استوعبت الصدمة
قلتله : اه كنت بايران و رحت عافغانستان وهلق باميركا ؟
قلي : لا انا مسلم من افغانستان
طبعاً كلشي صور مجازر و دبح ودقون تجلت قدامي و خاصة لما بهاللحظة اجا عباله يسألني من وين اشتريتي اللحمة ؟
للحظة حسيت انه ما رح موت بين نظام و معارضة متل ما بتخيل ، رح موت بسبب الكبة .. المهم بسرعة فقت من شبه غيبوبتي و قلتله : مابعرف جوزي اشتراها ، انتو شو اللحم اللي عندكن ( قلت لغير السيرة )، راح وجبلي وثيقة من المعمل الي بيتعاملو معه وانه كله حلال و قعد يقلي لا تشتري من برا هون مافي حلال بس من عندي .
وانا هز براسي و ارسم بسمة عريضة وكأني ملاقية اخي الضائع ( انه واااو عن جد حلال ، اخيراً لقيت حلال ، خلص مابقا دوق لحمة غير من عندكن )
وكل ما قرب يشمها او يحط ايده عليها قول خلص كشفني و عالاغلب موت بمكان جوزي اذا بيمرم كل المنطقة مارح يقدر يلاقيني .
وويني بدي اللحمة تخلص بقا و ايديي كلهن برغل و لحمة وويني عم صلي ما يزحط الجاكيت عن كتفي و يبين وشم الصليب .
قعد يحكيلي عن افغانستان و يسألني برأيك اي ائمن وانا مخي كله بالسكين الي بايده كل شوي يسنها و يمرق من جنبي و انا قول : خلص كشف اللحمة .
للامانة قبل ما امشي قلتله فك الماكينة و روح انقعها طول الليل بكل شي عندك مساحيق تنظيف .. قلي : ليش ؟ في شي باللحمة ؟
قلتله : له الله يسامحك بس البرغل ماقريت عليه يمكن يكون مو حلال .