و الله ما عرفان من وين بدّي ابدأ..
صباح الخير بالاول ، و كل رمضان و انتو بألف خير ، و انشالله رمضان الجاية منشوف اسماء الاسد فاتحة بسطة خرنوب و سوس بأزقة طهران ..
اربع سنين الله وكيلكون ، و مع اول صرخة حرية طلعت من شوارع درعا ، و انا و الحمدالله مشارك بكل شاردة و واردة بكل تفاصيل ثورتنا المجيدة..
اللي ما قدر بشار الاسد و عصابتو و شبيحتو يعملوه معي بأربع سنين، قدرت إدارة الفيسبوك تعملو بكبسة زر..
اربع سنين و هالصفحة ما وقفت ولا يوم..
من قلب اللادقية كتبت ، و ما قدر ترهيب النظام يوقفني، خرجت من سوريا لا ارادياً باتجاه دبي، و ما قدر نظام بشار الاسد يمنعني على الرغم من ملاحقتي بلقمة عيشي في دبي..
خرجت من الامارات و هالمرة كانت واشنطن هيّة وجهتي ، و عالرغم من صعوبة الحياة هون و التحديات الكبيرة اللي بتواجه اي قادم جديد الى العالم الجديد، و مع ذلك قدرت حافظ على نفسي الثوري ، و ما تنازلت لحظة وحدة عن مبادئي متل ما كتير ناس عملو من لحظة وصولهون لاراضي اميركا بغية ارضاء اصحاب قرار إعطاء أوراق اللجوء الرسمية ، و ضليت على نفس الخط ، لا بل يمكن صعّدت من حدة خطابي ، و مع ذلك ما قدر حدا يوقفني او يمنعني عن ممارسة طقوس الثورة اللي آمنت فيها و ما زلت مؤمن بأحقية اسبابها و أهدافها للعظم على الرغم من كل الشوائب اللي صابتها ..
لحد ما اجا هداك اليوم من شهر تماماً ..
فقت الصبح و خربانة الدنيا على صفحتي ..
تبليغات و تقارير و محاولة اختراق لصفحتي ، و تحذير من أصدقاء الصفحة عن طريق رسايل خاصة و عامة لاغلاق صفحتي تفادياً لإغلاقها ..
ساعة واحدة بعد كل هالتخبيص، بيجيني رسالة من المخابرات الجوية التابعة لإدارة فيس بوك الدكتاتورية بتقلّي فيها:
نتيجة لخرقي شروط الفيس بوك، قررت الادارة إيقافي عن اي نشاط فيسبوكي لمدة شهر كامل..
شهر تلاتين يوم.
تحرر فيهون نص ادلب.
و اتشكل فيهون جيش الفتح بالجنوب .
و شعلت فيهون جبهة حلب من اول و جديد.
و حاول النظام يوقّع العرب مع الأكراد ، و الدروز مع السنة .
شهر تلاتين يوم.
غرق نصرالله و كلاب الضاحية اكتر بوحول القلمون.
و مات زعيم ابو الفضل العباس.
و طلع صوت جنبلاط اخيراً بالجبل.
شهر تلاتين يوم.
مات فيهون تلاتة عزيزين على ألبي، زينا و عبد القادر و نبيل، و من الغربة ما قدرت قوم بواجب عزاءهون..
تلاتين يوم اجا فيهون رمضان .
و أهداني رب العالمين احلى بنوت بالدنيا.
تلاتين يوم.
اجتمعوا معارضة المعارضة في القاهرة ، و اتصوّر ديمستورا بجنيف مع ركّيبة الثورة الجدد، و نط فيها الاسد و ما حط من الفرحة بانتصار اردوغان الغير كاسح بالانتخابات الاخيرة .
شهر تلاتين يوم.
خسر ريال و ربح برشلونة . اتوفى منقذ العلي ، و زادت غلاظة مصطفى الاغا عرمضان. نجح ابن بشار بالبروفية بعلامات قريبة لنسبة التسع و تسعين بالميّة الحصرية عند بيت الاسد .
شهر تلاتين يوم .
كبرت الثورة شهر ، و راح من عمر بشار شهر.
و على قولة رامز قرش البحر:
الله لا يقطعلنا عادة، و لا يحرمكم مني و لا يحرمني منكون..
