Bassam Yousef
ذكرتني حادثة سقوط الطيارة الروسية اليوم ببحر جبلة وبسبب طائر دخل في محركها ببوست كتبته من زمان عن طيار سوري عقيد اسمو سلوم السلوم ( طبعا الاسم غير حقيقي والقصة غير حقيقية )، يومها ادعى الناطق العسكري السوري انو الدفاعات الجوية اسقطت طائرة اسرائيلية وطلع خبر الاسقاط كذب وتجليط كالعادة.
————————————————————-.
العقيد الطيّار سلوم السلوم يروي تفاصيل اسقاط الطائرة الاسرائيلية :
بشرفي كنت لسّا بأول كاسة متّة ، وإذ بالحاجب جاي ركد … قلي سيدي سيدي بيسلم عليك سيادة العميد وبيقلك تطلع بالطيارة فورا ، قلتلو شحاري لسّا ماشربت الا كاسة من ضرب المتة … خير انشالله شو فيه؟… ويا كرّ ليش ماحييتني اول ماوصلت ؟ قلي ياسيدي والله انشلشت ونسيت ..الله يخليك سامحني ، بس في طيارة اسرائيلية من شوي مرقت من جنبنا وكان الشوفير حيطط شريط اغاني وميترقوص متل فيفي عبدو ….
انا سمعت انو في طيّارة اسرائيلية وجن جنوني …. لهون وصلت معهن ..يحطوا شريط ويرقصو… والله لالعن ابوهن .. والله ياطويل العمر شلحت كاسة المتة من ايدي وقلتلو للحاجب ياجحش بس ارجع بحيسبك ..نسيت تحييني آآآ؟…حدا بينسى يحيي سيّدو؟؟.
وركدت ع الطيارة …. ضربت مرش ، قرد ما اشتغلت … تاني مرة ..ما اشتغلت …. دبيت الصوت ع الشباب ..دفشة ياشباب … المهم بلا طولة سيرة اشتغلت …. سألت الشباب من أي جهة مرت الطيارة الاسرائيلية ..قالولي من هون .
حسبتها قلت هلق اذا راح من هون معناها رايح يعمل كزدورة فوق الشام وبدو يكمل كزدورته من فوق لبنان وهوي راجع ، قلت أحسن شي لاقيلو قص علبنان فورا … والله ودعستلها بانزين ..وشخرتلك هالطيارة متل الفرس الأصيلة ..وشبّت لفوق .
لما وصلت فوق لبنان شفت ويحد ميلولح بالعلم الاصفر … قلت هاد من جماعتنا جماعة الممانعة وميسلّم علي … رديتلو السلام وزمرتلو زمورين ، بس ضل ميلولح بالعلم وميأشر على جهة …. فهمت عليه انو ميقلي من هون مرقت .
ياطويل العمر لفيت هالدركسيون بسرعة وشفّطت هالطيارة … الله وكيلك مافي نص دقيقة ولا بسمع صوت الشريط اللي حاطو هالعرص الطيار الاسرائيلي … رحت باتجاهو ..هوي شافني ودعسلها لطيارتو ع الاخير … ياخيي لشو الكذب طيارتو سريعة ..اسرع من طيارتي ومافيي لحقو …. شغل مخك ياسلوم …. يا سلوم شغل مخك ، لقيتها ، ماقدامي حل إلا الطيلو ع الكوع ، هلق ع الكوع بدو يخفف السرعة ، والله وطرت … هوي لف الكوع ورحت شيفطو هاك الصاروخ … شحاري طلعت طالع بطيارة مو مذخرة ..يعني مافيها لا صاروخ ولا طلقة …آشحاري على هالمصيبة .. وهلق شو بدي اعمل ؟.
ربك حميد انو الروسية موجودة بالطيارة … بس صار بعيد كتير … قلت بنزل لتحت قد مافيي … وبروح باتجاه فلسطين ..هوي بس قرب يوصل فوق فلسطين بدو يخفف ويمشي عمهلو … والله وهيك صار … بس صرت تحتو عجلت قد مافيي لحتى سبقتو منيح وفتحت شباك الطيارة طلعت الروسية لقمتها وبلشت اطلع طلوع لحتى صرت تحتو …. وشفطتو مخزن الروسية كلو … مافي ثواني ولا هالطيارة الاسرائيلية متشعل … لفيت ع السريع ورجعت لانو كنت صرت فوق حيفا وماني منتبه … والله وهيك صار .
بحضي لما نزلت بالطيارة يمكن هالكاسة المتة فيها مي اكتر ماكان بالطيارة بانزين ، واخيرا بهدي هالكاسة المتة ..عفوا هالانتصار لسيادة الرئيس بشار الأسد .
______________________________.
هلا جد اينو بتتصدق اكتر سحبة سلوم السلوم، ولا سحبة ناصر قنديل اللي نزل الصاروخ الامريكي بطلقة روسية …ونزلوا ساغ سليم مو مخدوش…؟؟!!.