من يومين شوفير التكسي عطاني ربطة خبز تازة وحلف مية يمين ما بياخود حقها..قال حرام ياخود حق الخبز ..
مبارح في ولد شاف رغيف خبز بنص الطريق سحبو وفتفتو وحطو عدكة الرصيف مشان العصافير..
بالسرفيس فيك تطلب رغيف من اي حدا معو ربطة خبز..بتطلب شقفة بيعطوك رغيف واكتر من ربطة بتنفتح ليعطوك.
في خضرجي كل يوم المسا بيترك ربطات خبز لعيل محددة..حلف مية يمين انو ولا يوم حدا اخد اكتر من حصتو او من حصة حدا…
حتى يلي بيبيعوا الخبز مرة واحد كسر الربطة ( يعني ماعادت للبيع لأنو نقصت) وعطا بنت رغيف..
لهلق اسهل شي تقول لجارك يللي مابيقلك صباح الخير عيرني رغيفين خبز…
ولما بتكون مارق جنب فرن والناس فاردة الخبز عالسيارات بس قول لحدا عطيني شقفة وشوف كم ايد بتنمد لتعطيك.. ووقت بدك بس ٣ ترغفة شوف كم ايد بتاخود العشرة من ايدك وبتقول للفران عطيها بس بدها بعشرة…
السر مو بالخبز ولا بريحتو..السر بها الناس يللي مصرة يكون الخبز دوزانها وضحكتها وريحتها واسمها كمان.
Salwa Zakzak
