التأصيل الطبقى لحكاية النقاب فى الجامعة الأمريكية :

Youssef Mishriki
لى صديق شاب (هو هيعرف نفسه) سنه أصغر من إبنى الصغير و لكن بكل تواضع بتعلم منه كتير أو على الأصح بيعرف يصيغ أفكار أنا عارفها مسبقا و لكن مش عارف أحطها فى كلمات : هو بقى بيحطها فى كبسولات دمها خفيف و سهلة الفهم و البلع و بالأسلوب الأبيح المحبب إلى قلبى… مش قادر أنقل البوست بتاعه هنا بسبب أصدقائى ذوات المشاعر المرهفة و لكن هلخص الفكرة ببساطة : هو ليه أصوات الدفاع عن النقاب خرجت من الجامعة الأمريكية بالذات ؟ طالبات الجامعة الأمركية يمثلوا طبقة فوق فوق العليا و نادرا ما تلاقى واحدة منقبة (مجموعهم 3 طالبات) و لكنهم كلهم ” متبرجات ” بيلبسوا لبس و أكسسوارات على الحبل توكل عشرين عيلة لمدة شهرين و فى نفس الوقت يدافعوا بإستماته عن الحجاب و النقاب و الرول موديل لهذه الفئة من البنات و السيدات هم ريهام سعيد و رانيا محمود ياسين اللى كل يوم بيبضوا علينا بالهبل و المواعظ المتناقضة مع مظهرهم… طيب ما تفسير هذا السلوك المتناقض فى ظاهره ؟ الملبس عامل مهم فى إظهار الإنتماء الطبقى و جرى العرف أن الطبقات العليوى لا تتنقب و يترك النقاب للطبقات التى ينظر لها بإستعلاء أنها طبقات متواضعة ! برضو ما سر الإستماتة فى الدفاع عن النقاب ؟ هو ببساطة أن المنقبة عندما تخلع النقاب يبقى الروس هتتساوى و الدليل على كلامى : خللى واحدة منقبة تقلع النقاب بإرادتها و تلبس قصير و تحط ميك أب زيهم : هيتمسح بيها البلاط و هيتقال عليها فلاحة و بلدى من نفس البنات اللى بيدافعوا عن النقاب !!
بس كبسولة سريعة حاولت ألخصها بدون البهارات المحببة لقلبى بتاعة صديقى العزيز عشان الناس اللى مش بتحب الحراق !!