اربع حيطان سكرتيرة ختم دائري بيوّزع شهادات الوطنية

خلصت حلقات مسلسل ضيعة ام الطنافس الضايعة، بعد ما طمر شبيحة ضيعة التخريمة نفايات كيماوية بأرضها ، و تركنا المخرج الليث حجو نغوص بالاستنتاجات عن مصير ولاد هالضيعة..
و كما هو الحال في كل المجازر التي تحصل ، هناك ناجي وحيد، المختار البيسة..
زهير رمضان اللي حقق حلموا بعد المجزرة و هاجر الى ضيعة التخريمة و صار عندو مكتب و اربع حيطان و سكرتيرة و ختم دائري بيوّزع فيه شهادات الوطنية على عبيد ابو شملة، و ختم بيطجّوا بالخيانة على صفحة كل مين أصر على اتهام ابو شملة بمحو هالضيعة الوديعة بسمومهون و نفاياتهون..
زهير رمضان اللي خوّن جمال و مكسيم و فارس و عبد الحكيم و يارا و مازن و لويز و غيرهون ، و شاف انو التمادي بوصف ولاد ضيعتو بالإجرام و سفك الدم السوري رح يزكّي أسموا عند ابو شملة و رح يعزّز من موقعوا التشبيحي الجديد..
تراب ام الطنافس يا مختار رح ينضف و يرجعوا الها ولادها مهما طال الزمن او قصر، و رح ترجع عفوفة على شباكها تتمعشق مع سلنغو، و رح يرجع الختيار على دكانتو ليبيع قضامة و بزر شمس ..
اما اهل التخريمة اللي لجأتلهون و نسيت ولاد بلدك اللي ماتوا و اتهجروا بسببها، رح تكون في مزابل التاريخ ، او قصة رعب رح نحكيها لولادنا يوم اللي بدنا نخوفهون من البعبع..
و من لسانك يا بيسة رح انهي ردي عليك:
خير ما فيك، دخّانك بيعمي..