ابني هشام لبكرة مو لمبارح

ما بتمر معنا جلسة ، الا الحديث دائماً بيبدأ بكلمة ( بزمانو )، كناية عن قصة قديمة صارت معنا تتناسب مع الموضوع المطروح للنقاش..
في كل مرة و اثناء حديث الماضي ، عن قصص صارت معنا باللاذقية، صرت باتطلّع بعيون زوجتي اللي خلقت بالغربة و عاشت طفولتها بالغربة و مازالت بالغربة، باتطلّع بعيونها و بشوف نظرات بتقول من دون ما تحكي :
معقول ابن اللاذقية ما عندو حديث الا بالماضي و بقصص الماضي؟؟
قصص ما بتتعدّى بحديثي حدود حكايات قهوة الشّدة اللي كنّا نرتادها، و لا النهفات اللي كانت تصير على مدرجات مباريات حطين، و لا بكون عم احكي خارج حدود غرفة صغيرة زجاجية مشمسة جمعتني بأيام من أيّامات المدينة الغير منتمية مع أعز الأصدقاء على فنجان قهوة ، مع ثرثرة حدودها الدنيا دق استغابة ، و حدودها الأقصى التحضير الى عشا اسبيرو اخر الاسبوع..
ما باستغرب من نظرتها، و لا عم حاول اليوم تفسيرها ، و لا انا بصدد الدفاع عن واقع جيلي لاربع عقود مرّت..
شو بدّي احكيلها عن غير الماضي، و نحنا جيل التناقضات ، الجيل اللي ما عاش يوم واحد لمستقبلو..
بحكيلها انو نحنا جيل السبعينات الضايع و اللي عاش على عز أهالينا من دون ما يكون عندنا إمكانية لنخلق عزنا و نورثو لولادنا؟؟
بحكيلها انو نحنا جيل ما عرفنا لمين انتماءنا، فلا نحنا جيل محسوب على حكمة الختايرة، و لا جيل ممكن ينحسب على جيل الايفون اللي بعدنا؟؟
بحكيلها انو نحنا جيل خلّصنا سنين مدارسنا و دخلنا جامعاتنا بما يتناسب مع علاماتنا ، مو مع ما يتناسب مع احلامنا !!!
بحكيلها انو نحنا جيل حمّص القهوة الخضرة بأيدو، و بعدها ريحة بابور الكاز عالقة بأنوفنا و نحنا عم نحضّر اليوم فنجان الاسبرسو على آلة تحضير القهوة الجاهزة !!!
بحكيلها انو نحنا جيل خلّص دراستو بالجامعة و عملنا دبلوم ورا الدبلوم ، و الماجستير ورا الماجستير ، و خدمنا جيش و انبسطنا انو انسحبنا احتياط ، لحتّى يضل عندنا حجة لهروبنا من مواجهة لحظة الحقيقة و دخولنا في صراع الحصول على وظيفة تليق بعدد دبلوماتنا و ماجيساتيراتنا !!
بحكيلها انو نحنا جيل كانت الغربة مو من ضمن ثقافتنا، و اضطرينا عليها متأخرين و نحنا في نص التلاتينات من أعمارنا و البدء من الصفر بهيك عمر؟؟
بحكيلها عن مديري بمدرسة الإعدادي ،المدير اللي من المفترض يكون قدوة لأي طفل بهالعمر ، بحكيلها لما روح لعندو بعد دوام المدرسة على بسطة الفلافل اللي فاتحها على باب بيتو لآكول سندويشة!!!
بحكيلها عن ابتعادنا عن قيمنا اللي ربينا عليها، و عن اتخاذنا لقرار عدم الزواج مو كرهاً بالعيلة ، و لكن لعدم قدرتنا على فتح بيوت و تأسيس أسرة !!
بحكيلها انو نحنا جيل منحكي بالماضي كتير ، لانو المستقبل ما كان من ضمن مفرداتنا !!!
بحكيلها عن معسكر العاشر ، و عن دورة المظلية و عن ايام الصاعقة ، و عن المعسكرات الجامعية في سطامو !!
شو بدي خبرك لحتى شيل من عيونك نظرات الاستغراب عن ارتباط شباب جيلي بالماضي و الابتعاد عن التفكير بالمستقبل؟؟؟
أربعين سنة ما عندنا فيهون الا قصص قهاوي اللاذقية ، و حكايات الملاعب و قعدات السمر و السهر مع الاصحاب على رمل البحر..
اربعين سنة ما بذكر فيهون يوم امتلكنا اداة من أدوات التخطيط لمستقبلنا..
أربعين سنة اعتقدنا فيهون انو المدرسة هيّة الحياة بعد الروضة ، و الجامعة هيّة الحياة بعد المدرسة، و تفاجأنا بعد التخرّج بدخول عالم السكون و الفراغ و الحنين لعجقة الدراسة اللي بتلهينا عن مرارة واقعنا..
العيب مو فيني و لا بأولاد جيلي، العيب كل العيب باللي جعل أقصى طموحنا انو يخلص اليوم فينا و نحنا منعرف شو عندنا تاني يوم نعملوا لمّا نصحى الصبح..
و بمناسبة الحديث عن زمانو..
بزمانو سألني الوالد ، شو بدّك تصير لمّا تكبر؟؟؟
مات من ١٥ سنة الله يرحموا و ما سمع مني جواب..
اليوم رح جاوبو و خلّي روحو ترتاح بقا:
انا يا ابي ما بقا عندي وقت لصير اي شي ، بس عندي كل الوقت لخلّي ابني هشام يحكيلها لمرتو بقصص بكرة مو بقصص مبارح..