ريما الرحباني
Reema Rahbany
الى أصدقائي الفيروزيين فقط لا غير.
بعرف إنّو الحملة الإعلاميّة الأخيرة الناتجة عن تصريحات زياد عن فيروز
ضايقتكن وتركت عندكن تساؤلات كتيرة.
ما تنطروا رد من فيروز، لأن متل ما كلّكن بتعرفوا، فيروز إلتزمت عدم الرد من زمان ومهما كان، فكيف إذا كان الموضوع بيتعلّق بزياد تحديداً.
وأنا ما رح صرّح شي عن فيروز. ولا أي حدا أساساً، مخوّل يصرّح عن فيروز،
وخاصة وأكيد مش مُلحقة إعلامية سابقة، فاتحة عَ حسابا.
بس بأكّدلكن من موقعي، ومن هالبيت، ومن دوري وحرصي وواجبي المحافظة على كل ما لها من إحترام لإسمها ومسيرتها ورسالتها وأعمالها وماضيها وحاضرها وأسلوبها بالتعاطي مع الأمور، إنّو هالموضوع، كما وإنو المواضيع والتصريحات السابقة السياسية والغير سياسية اللي تناولت فيروز، ما بيتعدّى كَوْنن تكهّنات وتركيبات زياديّة على حساب فيروز فقط لا غير.
ما تزعلوا.. مصير هالحملة، متل كل الحملات اللي سبقوها، بتعرفوا شو هوّي…
وحدا فيروز كانت وستبقى ذاتا.. حقيقة ثابتة.. والحقيقة مع الوقت.. وكل الوقت.
إنشالله بينعاد عليكن بالخير والسلام.. وبُكرا الحب جديد.
تضلوا بخير