قصة و حكمة من زياد الصوفي..101

القصة:

بتخلص جامعتك من هون، بتبدا اتدور على وظيفة من هون..

إذا كنت من أبناء السلطة، بتلاقيلك وظيفة حكومية براتب مقبول بالاضافة لشغل اضافي نتيجة عدم روحتك على مكتبك، و إذا كنت ابن عيلة معروفة بالبلد و الك معارف فبتروح بتشفلك شي وظيفة بشركة خاصة..

أما الشب أو الصبية اللي ما الهون حدا بالسلطة و لا معارفهون كفيلين يشوفولون شغل بالقطاع الخاص فمصيرهون إما البطالة أو الغربة..

هيدا حال الشب السوري بس يخلص تعليمو..

بس بالنسبة للشبيحة الجدد، شبيحة بشار الأسد، فهادول قصة تانية..

بتتذكرو حكاية بناية كمال الأسد اللي انهدمت و اللي حكيتها من يومين..

ذكرت أنو بأحد طوابق هالبناية كان عايش نمير حبيب مخلوف..

بأثناء سكن نمير بهالبناية كان مستلم الادارة العامة لمعمل الكونسروة..و بعد عمليات السلب و النهب المنظم و اللي رح أدخول بتفاصيلو بحلقة جاية، أعلن المعمل إفلاسو و قامت الدولة بتسكيرو و عدم محاسبة نمير مخلوف على هالعملة..

نمير من بين هواياتو الكتيرة، هواية جمع الآثار المسروقة، عمل ثروة هائلة من جمع و بيع الآثار لدرجة أنو هوة ما بقا يعرف شو عندو..

بعد ما وقعت البناية و خسر مجموعة كبيرة من التحف، و بعد ما فلس معمل الكونسروة، لاقى حالو قاعد ببيت أجار بمشروع الزراعة..

و بما أنو وقف مصدر دخلو ، شاف حالو صار عم يصرف من راسمالو، هالشي اللي بالعادة ما متعودين عليه بيت الأسد و مخلوف..

بسنة 2006 بيركب بسيارتو و بيطلع عالشام ليشوف ماهر الأسد..

ولك ابن عمتي، بترضى يكون ابن خالك قاعد لا شغلة و لا عملة و عم يصرف مصرياتو؟؟؟

من حسن حظو الافندي، كان منصب مدير عام شركة النفط شاغر و الوزير إبراهيم حداد عم يشتغل ليل و نهار لحتى يعبي هالفراغ لبين ما يستلم ادارة النفط شخص كفو لهيك منصب..

بيجي على مكتب ناجي عطري رئيس مجلس الوزراء قرار من ماهر الأسد بتعيين نمير مخلوف مدير عام لشركة النفط السورية..

بيتعمم القرار و بيصير نمير مخلوف أول مدير عام لشركة النفط، مدير ما كان الو مدة قصيرة مأعلن إفلاس مؤسسة معامل الكونسروة..

الوزير إبراهيم حداد و بكل شجاعة عارض الموضوع، من مبدأ كيف بتحطو شخص أعلن إفلاس مؤسسة على رأس إدارة أهم مؤسسة باتدخل مال للخزينة العامة ( جيوب بيت الأسد )..

بيتصل ماهر بالعطري ليجبرو للوزير حداد على الاستقالة.. و هاد اللي بيصير..

اتعين سفيان علاوي وزير جديد، و ضل ست سنين بمنصبو بس لمجرد رضا نمير مخلوف عليه..

أنتو لاحظولي دولة المؤسسات.. الوزير بيضل بوظيفتو إذا الموظف اللي تحتو رضيان عليه!!!

المهم.. استلم نمير هالمنصب و بلشت الرزقة تجيه إذا حك راسو بس..

بنفس السنة بياخود شاليه بفندق روتانا قعد فيها سنتين على حساب نزار الأسعد المتعهد لنقل النفط السوري، و اشترى البيت اللي كان مستأجرو بالزراعة و سلم الاكساء لمتعهد تاني بشركة النفط من بيت الخياط..

بالاضافة طبعا لخمس سيارات مخصصة لشخصو الكريم و بأرقام مميزة منشان يمارس مراهقتو مزبوط..

باحلى تعليق اسمعتو عن لسانو لما انسأل من أحد تجار اللادقية:

باينتك تعبان يا دكتور نمير، ليش ما بتقدم استقالتك و بترتاح من هالوجعة الراس؟؟

و كان جوابو: ولك يا أبو فلان، منشان ما يقولو أنو المهندس نمير اتهرب من أداء واجباتو تجاه وطنو..

و الأحلى من هاد كلو..

كل ما إجا وزير جديد عالوزارة، لازم يعمول زيارة للمهندس مخلوف لأداء واجب الطاعة..

و آخر الضحايا الشهر الماضي، لما اتعين الوزير سليمان عباس، و راح لتقديم نفس الواجب بس هيئتو ما كان عندو الكاريزما اللازمة و لا عندو قابلية التعاون مع نمير أفندي..

فلما أنسأل نمير عن الوزير عباس: كيف يا استاذ نمير ما بتحبو للوزير عباس و صار وزير؟؟

ببساطة لغة دولة المؤسسات و بالحرف الواحد: شغلتو ما مطولة بالوزارة، شهرين بالكتير و منطيرو ..

اليوم ثروة نمير مخلوف بحسب التقارير، 120 مليون دولار..

فهنيئا لنا بدولة الرجل المناسب بالمكان المناسب يا أبو حافظ، بس عالأغلب لما طلعت بهالنظرية، كنت مستثني منها بيت مخلوف..

هاد واحد نكرة من بيت مخلوف و هيدي قصتو و هيدي ثروتو، و ما خفي كان أعظم..

و جايتكون القصص يوم بعد يوم..

الحكمة:

انتاج سوريا يوميا 150 ألف برميل نفط خام..

ما شفنا منهون إلا براميل حقدك يا ابن السخام.. زياد الصوفي – مفكر حر؟