نصائح لتسهيل أعمال المنزل

((( بقلم خبير )))

يا أختي وقت بتطبخي اغسلي كل شي بتستعمليه لحظةَ الانتهاء من استعماله ولا تُجَمّعي الجلي لنهاية الطبخ !!! لا تستعملي الغرض وتْوِرّيْه بالمجلى ، ولا تحطي بالمجلى عباس فوق دباس ( مقلاية السمنه مع كاسة الشاي مع صينيّة الفرن مع الهاون مع قشر البطاطا مع تِفِلْ الشاي مع علبة البن الفاضيه ، مع قشر البصل ، مع عصّارة الليمون ، مع قنينة الحليب تبع أبنك مع الشوبَكْ تبع العجين مع المصفايه ) لأنو المجلى بتصير متل طنبر الزبّال، وبدّك ساعتين لتجلي هالخرابه
بعدين طنجرة البخار لمّا بتكون عَ النار مو متل لَوَياتْ إبنك يلي عم تنَضْفيه !! كل شوي بتْشِقي عليها وبتفتحيها لتشوفي اللحمه استوت ولاّ ما استوت … اللحمه إلها عيار ، والدجاج إلو عيار والشوربة بعدس إلها عيار وكل شي إلو عيار وإلو وقت ليستوي لازم تكوني عرفتِ هالعيار بعد كذا سنه طبخ !!!!
وقت بدك تطبخي حطي البندوره والبصل والبطاطا والخيار والفاصوليه والبقدونس والفجل وكل شي بدك ياه لهالطبخه ، حطيهم إدامك بعد ما تغسليهن … وعدي واشتغلي فيهن ، مو كل ما اعتِزْتِ شغله تروحي وترجعي من البراد للخزانه للبلكون وتضَيْعي ساعتين رايحه راجعه عم تهزّي متل شعرات المغربل !!!!!!!! وحطي كيس فاضي إدامك غير كيس الزباله الرئيسي يلي بالمطبخ من شان ما تِبْحَتي المطبخ ويْطُوْشْ حجَرِكْ وتصيري تصرخي متل أبو الفضل بضيعة تشرين …
ومو كل شي بيزيد بإيدك تاكليهْ ( إرْميّة الخسه ، آخر الخياره ، فجله صغيره ) ، ولا تاكلي شغله منزوعه من شان ما تْضَلي جمعه عَ الحليب !!!!
حَضَري مكوّنات الطبخه بترتيب يتداخل به وقت التحضير مع بعضه لاختصار الوقت يعني حطي الزيت عَ النار ليحمى بين ما تقشري البيتنجان ، وبعد ما تحطي البيتنجان عَ النار قشري البصل وقطعيه بيكون البيتنجان استوى وبتقلي بالزيت الحامي البصلات … وهادا كلّو لازم تكوني حاطه اللحمه لتستوي ، مو كل شغله تعمليها لوحدها … لأنو بيأدّن المغرب وما بتخلصي …
ومو كل ما ذقتِ أكله بتطالعي معلقه جديده وبتلحشيها بالمجلى … بيخلصوا المعالق وأنت عم تدوقي وتِلِحْشي !!!
بعدين خاتم الألماس وخاتم زواجك يلي يحمل ذكرياتك الحزينه !!! لا تحطيه بطرف المجلى … لأنو بيروح بالبلوعه وأنت عم تنضفي المجلى وأنت باللحظات الأخيره من تنظيفك للطنبر يلي عميتي قلب حالك فيه
بعدين ببوس إيدك حطي بشكير نضيف بمكان استراتيجي بالمطبخ من شان تنشفي إيدك كل شوي والتانيه … مو ضروري تنشفي بفستانك وتسحبي ايدك سحبتين عند خواصرك متل اللحام وقت بدّو يسِنْ السكينه من شان يذبح الخاروف … لأنو إذا عَلْقان كم شعره بفستانك رحْ نلاقيهم بالكوسايه … وما حلوه نستفرغ على طاولة الأكل
وأسألك بالله … وقت بِتْلِفِّي يبرق لاتمسحي منخيرك بالسبابه لأنو هي أهم عضو بلف اليبرق … واليبرق مو طيّب إذا الرشح معو سيلان أنف !!!!
وإلي رجاء عندك ابتسمي وكوني مُشرقه وأنت عم تشتغلي ما تكزّي على سنانك وتكرهي كل البشريّه أثناء الشغل ، لأنو أقسم بالله أنّ مُهمّة إطعام الأسره فيها من المعاني الجميلةِ ما لا يجتمع في غيرها من الأعمال … وقد جربت هذا ..????

د.وائل حبنكه

About أمل عرافة

أمل عرافة خبيرة فلكية مجازة من معاهد لاس فيغاس ولندن, نيودلهي, بكين وطوكيو وجنوب افريقيا, دراسات معمقة في علم التنجيم , اهم ما تنبأت به هو كارثة تسونامي, وصول اوباما الى رئاسة اميركا, وحادثة الطائرة الماليزية, كاتبة مغربية بشؤون المرأة العربية والفن
This entry was posted in الأدب والفن. Bookmark the permalink.

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.