لا تحاول الاتصال مجدداً احسن ما العن امّك على ابوك

من اكتر العبارات اللي كنت أتمتع باستخدامها و سماعها باللادقية ، العبارات المستخدمة من الناس للطلب من شوفير السرفيس بالتوقّف.

– الشب المثقف: عرياحتك معلّم..aza
– الشب المتديّن : زكاتك عند الموقف الله يرضى عليك..
– الشب الزعوري : نزّلني عمدرسة البنات ابو الشباب..
– الشب العصبي بيصرخ بقرف: وقّف ولا خي عاليمين وقّف..
– بنت الجامعة :باتهز كتف الشب اللي قاعد قدّامها و بتقلّو: الله يوفقك قلّو للشوفير ينزّلني..

وهكذا، فلكل شخص طريقة بطلب النزول من سرافيس طلب الحياة ، تماماً متل اللي بدي يصير مبارح بطلب حلفاء الاسد بالهروب من سرفيس الموت الاسدي..
– مبارح وئام وهاب : أغلقت مكاتب حزبي في سوريا لتعرضهم لمضايقات من رجل امن..
– اليوم رح يطلع علينا ميشيل عون: نزّلني ابو حافظ ، ضرصي عم يوجعني ، رح صلحو عند الحكيم سمير و برجع بطلع معك اذا الله راد..
– بكرة بينط حسن نصر الله: و الله يا ابو حافظ بدك ما تواخزني بس هالعكروتة ام هادي طلعت حامل و انا من سنتين ما لامسها، خليني شوف مين عامل هالعملة و برجعلك..
– بعد يومين بيطلعلنا سليمان فرنجية: لا تزعل مني ابو حافظ بس برنامج آراب ايدول رح يبدا، نزّلني الله يرضى عليك خليني احضروا ، و ببقى باتطمّن عليك من وقت للتاني..
– تلات ايام من اليوم بيطلعولنا شيعة ابو الفضل : مشي الحال ابو حافظ ، عرفنا مين قتل الحسين ، بقا نزّلنا عمفرق البوكمال و نحنا منقطع الحدود مشي لا تتعب حالك..
– بعد اسبوع بيهرب لافروف من شباك السرفيس و بيغيّر خط موبايلو..

كم اسبوع بيتطلّع بشار بالمراية على الركاب من ورا ليشوف انو سرفيسو صار فاضي ، بيصرخ لمساعدو اللي بيلم الأجرة :
– و لك حيدر ناولني غلة اليوم يا ولد.. بس حيدر مو موجود، هرب بالبوكمال مع شيعة العراق ..
بينتّع السرفيس و بيخلصو مازوتاتو، بيتصّل ابو حافظ بالخامنئي ليبعتلو حدا يعبّيلو ياه ، بتطلعلو الرسالة الصوتية التالية:
الرقم المطلوب غير مخصص او خارج الخدمة حالياً، لا تحاول الاتصال مجدداً احسن ما العن امّك على ابوك ..

About زياد الصوفي

كاتب سوري من اللاذقية يحكي قصص المآسي التي جرت في عهد عائلة الأسد باللاذقية وفضائحهم
This entry was posted in الأدب والفن, ربيع سوريا. Bookmark the permalink.

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.