قصة و حكمة من زياد الصوفي..49

القصة:

لما كبرو فواز و منذر الأسد، و اتطمن عليهون أبوهون جميل أنو الحمدالله مستقبلهون اتأمن و كل فدان فيهون صار عندو بدل البيت عشرة، و بدل السيارة صار عندهون ألف، و ملايين الدولارات بحساباتهون جوا و برا البلد، و شغل التهريب بكل أنواعو و التشبيح و الاتاوات و كل مصادر المال السهل وفرلهون ياها..

و بلحظة صفن و رغبة، قرر الشيخ جميل يتزوج.. لما فاتح ولادو بالموضوع، أكيد ما كان حدا قادر يفتح تمو قدامو..

بالفعل بيوقع الاختيار على طبيبة باللادقية و بيتزوجها..

سنة بتمر و هالدكتورة مرة الشيخ بتحبل و بتجبلو حيدرة..

هالشي طبعا ما كتير استلطفوه فواز و منذر لعلمهون أنو أبوهون رجل بالدنيا و رجل بجهنم، بس ما كانو مع ذلك قادرين يعبرو عن كرهون لهالولد..

بالفعل المتوقع صار..

و بيوم من بالإيام بأواخر التسعينات، منفيق باللادقية على خبر موت جميل الأسد..

رسميا: جميل الأسد عضو مجلس الشعب عن مدينة اللادقية..

اجتماعيا: جميل الأسد رئيس و مؤسس جمعية المرتضى الإسلامية للأعمال الخيرية، و حطولي عشر آلاف خط تحت كلمة خيرية هون..

اقتصاديا: جميل الأسد رئيس و مؤسس شركة الساحل للأتاوات الجمركية..

تشبيحيا: جميل الأسد صاحب أكبر شبكة تهريب دخان في الشرق الأوسط..

عائليا: جميل الأسد هوة الأخ الشقيق لحافظ الأسد..

بيطلع قرار بالجنازة المهيبة، ما بيضل موظف دولة و لا طالب مدرسة و لا مسؤول و لا عضو عامل و لا نصير إلا بيطلعو بجنازة الشيخ جميل..

البلد اتسكرت و صور الشهيد عبت الحارات و الشوارع، و كمية لا يستهان فيها من النفاق و أبيات الشعر و الغزل بمناقب شهيد الأمة..

الكل كان عينو على الجنازة ، إلا ولادو عينهون كانت على الورثة الهائلة اللي تاركها..

بيخلص الهرج و المرج مع نهاية التشييع و التعازي، و بيلتفت فواز و منذر عاللحظة اللي هنن بانتظارها..

بيتصلو بالمحامي منشان حصر الإرث، و بيروحو لعندو..

البقية بحياتكون يا شباب، اللي خلف ما مات، الله يرحمو ما كان في اطهر منو..

خلصنا استاذ، شبعنا شعر و غزل تلات أيام، خلينا نشوف شو تاركلنا الوالد..

كلشي كان تمام، الأراضي و البيوت و العقارات و الكاش و السمعة الحسنة كلها لفواز و منذر.. إلا بوصية صغيرة، تارك الشيخ جميل مبلغ مرقوم و شوية عقارات لحيدرة ابن مرتو الجديدة..

الله لا يشبعهون الجوز ، بينطو الاتنين بأرضهون و بيقولولو للمحامي: على جثتنا هالابن الحرام بياخود قرش..

بس يا استاذ فواز هيدي وصية الوالد و كاتبها بخط أيدو و هالكم عقار موهوبين للصغير..

بدك تعمل شي بهالموضوع، قرش واحد هالمسخ أبياخود..

بيقلهون المحامي باستهزاء: والله يا شباب مافي غير أنو المرحوم جميل يفيق من موتو و يلغي هالوصية، غير هيك ما قادرين نعمل شي ..

هلأ هون المحامي و لا كان بيتوقع أنو كلامو عن فيقة جميل من الموت الها أي معنى، بس فواز و منذر حطو هالحكي براسهون..

هات يا استاذ كل الأوراق اللي لازم الوالد يوقعهون و يبصم عليهون حتى تلتغى هالوصية.. بيقلو فواز للمحامي..

المحامي بطيب خاطر و بدون فرض لأي نية سيئة بيعطيهون المستندات اللي لازم يبصم عليها جميل و بينتهي الاجتماع..

آخر شي في حياتكون ممكن تتوقعوه صار..

بيجمع فواز أربعة من كلابو، و هالقصة روالي ياها واحد من مرافقتو اللي كانو بالحادثة ( ماهر مغيروني) ، و بيطلعو على قبر جميل الأسد..

الميت ألو أربع أيام مدفون.. بينفتح القبر..

نعم بيفتح قبر أبوه..

بيبصمو على كلشي، و بيرجعو بيطمروه.. و لا مين شاف و لا مين دري..

القصة انطبلت بالبلد و خصوصي لما المرة الجديدة كبرت الموضوع كتير بعد ما انحرمت هية و ابنها من ورثة شرعية بيتحقلهون، و نتيجة المشاكل اللي تبعت هالحادثة، و خصوصي لما الدكتورة وصلت هالشي للقصر، و بعد ما منذر ضربو للمحافظ بالشيخضاهر لما حاول يتدخل لحل القضية، كانت النتيجة أنو بشار سحبو لمنذر من اللادقية سنة 2004 و حطو بالشام عقوبة ألو، الله يطعمنا هيك عقوبة..

الحكمة:

معروف عن بيت الأسد نبش القبور و سرقة الآثار، بس جديدة عليهون فتح قبر شخص عم ينشوى بجهنم و ينكوى بالنار..