#جورج_وسوف علمني أدخن……..قصتي مع جورج وسوف

الكاتب السوري اشرق مقداد

قد تتسائل شو جاب حوراني بنيوزيلاندا لجورج (ابو وديع) وسوف ملك الطرب (سابقا للأسف) ومن وين لوين ليعلّموا الدخان؟؟؟؟
هادا ياسيدي لما كنت بالصف السابع (أول اعدادي) دخلت شبيبة الثورة المظفرة وسريعا دخلت في فرق التمثيل (الكوميدي لاتئرف) وعزف الأوكورديون.
وعلى مايبدو إما من قلة الحوارنة في هذا المجال (تبع الهمل والصيّع) أو لموهبة خارقة من جنابي طلب مني وفرقة الهمل(المرحوم نبيل كنهوش والعميد الأن اياد عباس) تحضير مسرحية قصيرة فكاهية بمناسبة ثورة الثامن من آذار “الرشيدة”
والتي ستقام بهذه المناسبة على مسرح سينما الأندلس (الله يرحمها)
وأنذرونا أن “المحافظ” بقدره وجلاله وأمين “الفرع” سيحضران بالإضافة لمشاركة فرع حمص للشبيبة بالإحتفال معنا (في درعا) .
وفعلا قدمنا عرضنا “الناجح” وفي الكواليس قابلنا فريق شبيبة حمص والذي سيبدأ تقديم عروضه بعدنا مباشرة
وكان معهم “ولد” مدعبل” مكزبر شعرو” قالولي انو كان قاعد يتمصخر على مسرحيتنا” ويقلد لهجتنا الحورانية
وقالولي أنه مطرب واستغفر الله العظيم من كل مطرب
ورددت الجميل “لهذا” المطرب وكنا أنا وشلة العرصات نصفر ونواوي له
فغنى لأم كلثوم غنية واحدة وحلّ عن طيزنا وعرفت وقتها أن اسم هالبطبوف الحمصي جورج وسوف نجم فرع شبيبة حمص الصاعد
للأمانة كان صوته “ماشي الحال ” ولكنه صوتا نسويا لم ينفع معنا الحوارنة حيث نحنا متعودين على أصوات اكثر خشونة كفهد بلان مثلا
في صيفية تلك السنة كان سيعقد المهرحان السنوي الفني لشبيبة الثورة في حمص وحضرنا مسرحية للمشاركة في هذا المهرجان
شاركنا في المهرجان وفزت أنا (بلا زغرة) بجائزة الإخراج والتمثيل وطلب من الفائزين القدوم لدمشق لتسلم الكؤوس “ومئة ليرة” تنطح ليرة
وفي اليوم المحدد “نزلنا على الشام” والى قيادة شبيبة الثورة
حيث تقابلنا مع كل الفائزين ولمفاجأتي الغير سارة كان من الفائزين “البطبف” الحمصي جورج وسوف الذي قررت من زمان أنني لا أطيقه


وحتى يكمل النقل بالزعرور قالوا لنا أن الإحتفال الرسمي في اليوم التالي وسنقضي الليلة بفندق “امية” كل اثنين بنفس الغرفة وطبعا بحسب حضي الخارق كان نصيبي أن أشارك البطفبف الحمصي جورج وسوف بغرفة واحدة
(يريدون توزيع الرفاق وتفريقهم بحيث يتعرفون على بعضهم البعض)
اخذونا على الأوتيل
طبعا أنا بعدني بريء جدا حتى كلمة رزيلة واحدة مابسترجي احكي
وحطوني مع جورج يللي كان اكبر مني وبيدخن وبيشرب (العرص كان بس 15) ومش بس هيك بيعرص وتبع نسوان وأني بريء يابيه!!!!
اه وكان ساقط بالكفائة (الصف التاسع يعني كمان جحش بالمدرسة)
المهم رحنا على غرفتنا
وتعال “جمّع” على جورج….الزلمة بين كل كلمة وكلمة بدو أمي تحطلوا فليفلة بثمو قد مابيوسخ هالولد…….وبيجكيلك ب17 موضوع بوقت واحد ولابيكمل اي موضوع
وسريع جدا ومابيعرفش يقعد على طيزو ابدا وسيكارة بطيز سيكارة
المهم سألني اذا رح اقعد بالغرفة طول الوقت قلتلوا لا طالع على العشى ببيت خالتي وناطرهم يجيوا يوخذوني
قلي ايمتا بترجع قلتلوا بعد العشرة بالليل…..انبسط الزلمة
وفعلا رحت ورجعت بعد ال11 وماكانش جورج وافهمت بعدين انو كاين جايب بنت على الغرفة ومسكوه موظفين الاوتيل وكحشوه
ولقيت باكيت دخان مالبوروا مليان وقداحة تاركهن جورج لما كحشوه على عجلة
وهو دقرت وأني اتفرج على الباكيت….يازلمة حلو…….وريحتو حلوة……
وحسيت أنو زلمة لما أمسك السيجارة بإيدي
وشعلت وحدة وسعلت لحتى “صار يطلع الدخان من فوق ومن تحت
ولكن كل شوي ارجع اشعل وحدة ثانية……..ومن وقتها لثلاثين سنة دخت الله يصطفل فيك ياجورج يا ابن وسوف
مرت السنين واجتمعت مع جورج بسيدني هون …..وإنو يذكرني؟؟؟
الله يعينوا موهبة رائعة ….دمر حياتوا بالمحرمات….والا شوية حياتي اني
ايييييه ياجورج الله يلعن المالبورو والقداحة
اشرف المقداد

نرجو متابعتنا على فيسبوك وتويتر بالضغط على الايقونتين
This entry was posted in الأدب والفن. Bookmark the permalink.

Leave a Reply

Your email address will not be published.

This site uses Akismet to reduce spam. Learn how your comment data is processed.