نصائح للمطاعم العربية في الإتحاد الأوربي:

Joud Akkad

نصائح للمطاعم العربية في الإتحاد الأوربي:
١. سمي اسم متل ياسمين الشام و الشامي و الدمشقي
مشان ماحدا يقدر يحجزلك اسم للموقع تبعك كون كل في مية مطعم بنفس الاسم فتح و ٢٠٠ عم يفكروا ومشان لما نشتغلك تسويق الناس تضيع عن اي مطعم عم نحكي
٢. شغل عيلتك الكريمة بالشغل بحيث تخجل منهم و خاصة كل شي عندو شعر بايده وشعر بانفو و كلشي ما بيغسل ايده بعد مابيطلع بالتواليت وبزمناتو كان يكش عالشوي لما كان بسوريا
٣. جيب ارخص انواع اللحمة و يكون مكتوب عليها حلال و طلعها من الفريزر ارجع رجعها ارجع طلعها هيك لتنزع اكتر ماهي منزوعة وحطلها كتير بهارات مشان ما تبين بالاكل
٤. قطع الخضار بدون غسل و بنفس لوح تقطيع اللحمة و بنفس السكين
مشان تعمل مناعة لزباين
٥ . قول للشغيلة انو يلبسوا شحاطة اصغر من نمرة رجلهن بنمرة وبلا جرابات وياريت باضافر تحتها وسخ وشوية فطريات وكعب رجل كلو مقشب ومقشر ومحفر وياريت كل واحد يلبس بنطلون شكل شي اسود شي جينز شي بنطلون رياضة ..و ياريت البلوزة تكون بيضاء مع اسم المطعم و تكون كلها بقع بتفتح نفس الزبون
٦.اضافر الايدين يكونوا طوال خاصة اول اصبعة و تحتها اسود مابدك توصاية
٧. الخضرا من ارخص نوع وتكون منزوعة شوية و ارخص الانواع
٨ الطباعة للمنيو تكون خلفيتها لقصر شامي و صحون بحجم خرافي و اكل ما بينزل متلو بالمطعم
٩. افتح صفحة عالفيس وياريت حساب شخصي ” ممنوع الواحد يعمل حساب باسم مطعم أو اي نشاط تجاري” بالمناسبة لازم حصرا صفحة و سلمها لابنك الصغير عحسبة انو عبقري زمانوا بالفيس
وكل ماكتب زبون تعليق سيء عملوله بلوك و اذا مافيك اتصل مني وفاصلني عالسعر مشان اعملك تعزيلة لتعليقات جوجل خرائط
١٠. جيب فيديو تطبيق من الانترنت لافخم فنادق الشام وبيروت و أكل تركيا و دمجهن ببعض وخلي يكلف شي ٥ يورو وقلي شايفة كيف الشغل

١١. ماتدفع لمصور حق تصوير الاكل اكتفي بالصور من جوجل
١٢. لاتدفع لخبير في التسويق الالكتروني
١٣. بس تضطر تجيب واحد محترف تسويق لاتكون مجهز حالك ولا عندك عدد كافي من الموظفين وايام الدعاية والعرض خلي يسود وشك ادام العالم
وحط الحق عليه للي عملك الاعلان لانو انت كان بدك ١٠ زباين كل يوم لمدة شهر
ماكان بدك ٢٠٠ باليوم وانت مافيك تستقبل اكتر من ٧٠ ..
١٤ . غير الطباخ و فاصلوا وزعلوا مشان قرايبنك الي عم يشتغلوا ونزل مرة اخوك عالمحل بحكم هي سفرها بتبيض الوش واكيد رح تعرف تمشي المحل
١٥ .لا عاد تنظف المحل مافي داعي ركز بس عالاكل حتى لو الناس صارت تدوس عالبرغل والرز والبطاطا بالاراضي
١٦ خصص طاولة لرفقاتك الزعران الي ببصبصوا عالنسوان و خليهن ملزوقين من الصبح للمسا مشان يزعجوا الزباين
١٧ . لا تحدد عدد الاطفال الموجودين بالمحل واستقبل كل الاطفال حتى تقلب حضانة
واكيد ماتخصص اي مساحدة الهن مشان اللعب و الرسم وهيك
وعادي اذا شي ولد لاقيته بالمطبخ خاصة اذا كان ابن رفيقك
١٨.ماتاخد غير كاش .. ووظف الناس برواتب قليلة مشان تغير موظف كل يومين
واشتكي من قلة الجدية
١٩ . رشش لعابك وانت عم تحضر الاكل توفير لحق الكمامة
٢٠ وهي الأهم لاتتصل فيني انقذك من كل ماسبق !

This entry was posted in فكر حر. Bookmark the permalink.

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.