من أغرب الاستشارات القانونية الان #سوريا

خضر سعد مخلوف

من أغرب الاستشارات القانونية
حدث اليوم : اجاني تلفون من أحد الأشخاص وقلي عايزك باستشارة أنا وعائلتي قلتلو تفضل .. قلي معلش أستاذ لازم نشوفك كلنا .. المهم نزلت شفتو هو وعائلتو الكريمة المؤلفة من ٤ أشخاص (اب وام وبنتين ) .. قلي سؤالي الك وبتمنى تاخد الموضوع بشكل جدي لانو غير قابل للمزح ابدا .. قلتلو تفضل .. قلي شو الجريمة اللي عقوبتها بالقانون ٦ شهور ومن دون ما يموتوني من القتل والتعذيب جوا السجن ؟!
قلتلو رح جاوبك بس ليش هالسؤال هاد بهالتوقيت ومنزل عيلتك كلها معك مشان هيك جواب .. كنت اسألني عالتلفون بجاوبك عليه .. قلي بالحرف نحنا عيلة يا منموت سوا يا منعيش سوا والجرم لازم يكون مشترك وجماعي لنقدر نفوت كلنا عالسجن ناكل ونشرب وننام لانو بصراحة ما معنا ناكل والحالة تحت العدم ومافيني شوف عيلتي عم تجوع قدام عيوني وانا واقف مافيني اعمل شي ..
قلتلو بس بهالحالة بتصير محكوم .. بجاوبني بالحرف محكوم وعم آكل احسن من (غير محكوم ) والفقر عم ياكل من جسم ولادي .. والله بيعرف انو مو مجرم وهيك بفوت عالسجن وانا ضميري مرتاح ..
قلي كرامتي وكرامة ولادي هي لقمة العيش والجريمة متل بعضها بس الله يوفقك تكون جريمة ما ناكل فيا قتل كتير ..
لاول مرة بتاريخي كمحامي بعجز امام استشارة ..
فجاة بطالع سند امانة من جيبتو وبيبصم عليه انو انا مدينو مبلغ من المال وبقلي حرفيا ادعي عليي بحسنة هالاولاد لا تردني خايب ..
(طبعا تم حل موضوعو بوساطة أهل الخير بس كم فيه عيلة هيك ياوطن ؟ )
الزبدة يا وطن انو المواطن بلش يفكر بالجريمة ليعيش بس ليعيش مو لشي تاني ..
تشريع الجريمة الممنهج في سوريا أصبح قاب قوسين او ادنى

This entry was posted in فكر حر. Bookmark the permalink.

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.