منيح إللي صهرك أسلم، عقبال ما تأسلم انت ونصير نشوفك بالجامع..!!!

Eiad Charbaji

بنت عيلة عربية مسلمة بأمريكا، اجاها عريس امريكاني مسيحي، الشب والبنت بيحبوا بعض، بس اهلها اشترطوا على العريس يأسلم منشان الحلال والحرام.
الزلمي والله ما كذب خبر، قلهن شلون منعملها هي الشغلة، قالولو تعا على الجامع باليوم الفلاني.
اجى عالجامع، بعد الصلاة وقفه الامام. قول أشهد ان لا اله الا الله وأشهد أن محمد رسول الله. قال.
انبسطو وكيفو الاخوة المؤمنين وكبروا وصارو يبوسو العريس وهاد إللي يعطيه مصحف وهداك إللي يدهنو بالعود.
طبعا الصبي لا أسلم ولا بلوط ولا فهم شو حكى بس حبيبتو يبدو مفهمتو انو قول هالكلمتين وخلصنا، و بيت حماه كمان ما ركو عليه انو عميل هالشغلة كرمالنا بعدين ساوو إللي بدكن ياه، وشكلو ولا حدا بالجامع اصلا مقتنع بكل هالفلم، بس انو يعني ارتاحوا نفسيا وصوروا على موبايلاتهن وبلشو يبعتو عالواتس انو شوفو، والامريكان يدخلون دين الله افواجا بعد ما شافوا اخلاق الجالية، والإسلام اذا حاربوه اشتد واذا تركوه امتد ومن هالحكي.


هلأ هاد المشهد معتاد جدا هون، بس اللذيذ بالقصة وين، انو شيخ الجامع وقف قدام كل العالم وبين المزح والجد لطشو لأبو العروس:
منيح إللي صهرك أسلم، عقبال ما تأسلم انت ونصير نشوفك بالجامع..!!!

This entry was posted in الأدب والفن. Bookmark the permalink.

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.