ليه الكيل بمكيالين ؟


لاننا بلد بتحامي للذكور وبتدافع عنهم وبتيجي دايما على الانثى
لاننا بلد شايفه ان لعيبة الكوره اهم من الدكاتره والعلماء والفنانين والادباء
لاننا بلد بتشوف الفن انحطاط اخلاقي وفسق وفساد وانحلال وممكن تطلعلك عشرات الايات والاحاديث اللي بتحرم الرقص والغناء والمزيكا والرسم والسواريه والتمثيل والمسرح وفي نفس الوقت ماعندهمش اي مشكله مع السرسجيه والبلطجيه وما يسمى باغاني المهرجانات .

لاننا بلد بتساعد المتحرش وبتهربه وبتلاقيله الف عذر بينما البنت اللي هي الضحيه من الاساس بنرمي عليها كل التهم . اصل لبسها اصل صوتها اصل مشيتها اصل شكلها وكأن الذكر مولود ملاك مابيغلطش والانثى شيطان رجيم لو اتنفس بس تحصل كارثه

لاننا البلد اللي مابتربيش الولد من الاساس وطالقاه في الشوارع يأذي ويخرب ويبلطج وفي نفس الوقت بتقيد البنت وبتحاصرها بالوان العذاب والتهديدات لو عملت اي شيء ولو بسيط
لاننا بلد بتكره الانثى وبتحتقرها وبتقدس الذكوريه والعنف والهمجيه والتعصب بكل اشكالهم

لاننا البلد اللي بتسخر من قضية الحريه الشخصيه وبتعتبر ان الست اللي تعمل اللي هي عايزاه تبقى فجرت واجرمت . لاننا البلد اللي ادمنت الفاشيه والتسلط والتحكم في حياة الاخرين والقاء الاحكام على شكلهم ولبسهم .

لاننا البلد اللي ماعندهاش مشكله مع الرشوه والشتايم والتحرش والمحسوبيه والكوسه والفساد بكل اشكاله طالما اللي بيعمله ذكر حافظ قرآن وحاطط ادعيه وحاجج 5 مرات ومابيتكلمش غير بقال الله وقال الرسول .

باختصار لاننا دوله دينيه يا ست رانيا . والدوله الدينيه بطبيعتها هي دولة الظلم والنفاق والفاشية والذكورية .

About رشا ممتاز

كاتبة مصرية ليبرالية وناشطة في مجال حقوق الانسان
This entry was posted in فكر حر. Bookmark the permalink.

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.