لما بتكتب حكايتك يعني انت عايش

لما بتكتب حكايتك يعني انت عايش..مافيني اكتب قصة بني آدم هلكان من الفقر وارسم عوجهو سمايل كذابية..
حلمي انو الغالبية ياخدوا فرصتهم ويكتبوا قصصن..مو لنقل الحزن ولا ليسمعوها العالم بس…لا السبب الاهم انو يلي عم يكتب ومع كل مسكة قلم بيحس انو عايش وانو عم يكتب ليعيش..وانو حابب يصرخ وما يضل صوتو محبوس وعم يراكم قهر..
حابة الكلمات تتجمع والصوت يودي ويلتقي بالصوت التاني..هي فذلكة بيجوز..بس انا من كتر مو قريبة من الناس بعرف قيمة حدا يقلك انت عم تحكي بلساني…او يقول يعني اذا حكيت بيصير للحكي قيمة؟ القيمة هون للحياة…للشخص العايش ويلي الحكي عم يسويه مرتبط بغيرو وبوجع غيرو وبحلم غيرو…
انا ماعندي وصفات سحرية..واكتر شي كرهتو بعد الحرب هنن محتويات سلة الإعانة وبرامج الدعم النفسي الكذابية والمعمولة نسخة وحدة لكل شعوب العالم…
انا بكتب مشان اتوازن صح…وبكتب كل يوم ورغما عني وعن الوقت لانو الكتابة واجب علي وفعل حياة وسندة كتف للساكتين والمغمورين بالقهر..


انا بعرف لما حدا بدو يغطي الحقيقة بغربال البخاويش رح تكون كاشفة بس مو عاطية الصورة الكاملة…وبعرف انو الحقيقة مو ملك طرف واحد..وانو يلي ما انحكى اكتر من كلشي انحكى…وانو كتبوا عننا كأرقام..كموتى، كنازخين وتقارير طويلة وعريضة للدول والمنظمات..بس دايما التاريخ بينكتب بقلم الصحيان وصاحب السلطة والمال..انا بدي تطلع ريحة الجوع…بعرف ناس كتار كتبوا عن قهر المراة..بس بدي ياه من لحم ودم مو بس إحصائية وتحليل وكلام جرايد..
ريحة الخبز اليابس مابتشبه ريحة الخبز التازة…والخبز التازة علقم وحلم ودروب مسكرة ودروب مفتوحة عنار جهنم…هيك الخبز بالنسبة الي مو بس لقمة وتم مفتوح وصور مبكية…
بكتب مشان بكرا يقول انو في ناس ضاعت بالطوشة بين الرجلين وماحدا ذكرها لانها مانها محسوبة عحدا…وفي ناس ماضل ظلم الا ما لطشها وبالأخير هي مصنفة انها بخير وعايشة ومخونة ومنسية ومتهومة حتى بشرفها وحتى باسمها وباسم خانتها…
انا بكتب لانو مافيني ما اكتب..مافيني اصرخ ولا فيني اسكت..بكتب لانو كتافي مو الي وحملن تقيل والحمل ذات نفسو بيقلي لك اكتبي ياسلوى اكتبي..وبكتب والحمل بيصير حمال الي والكن وبيني وبينكن..والحمل بيصير رفيق قاعد جنبي عم ينقلني ويذكرني بكلشي..مشان لا انا انسى ولا الناس تموت مرتين…مرة بالتجاهل ومرة بالقتل المتعمد…

سلوى زكزك اديبة سورية

This entry was posted in الأدب والفن, ربيع سوريا. Bookmark the permalink.

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.