بنص البزورية امراة وزوجها فاتحين الموبايل وعم يحكوا مع ابنن المسافر..صوتن عم يرن رن من الفرح وعم يتخانقوا مين بدو يشرح للابن هنن وين، وشو المحل وشو هي انواع البضاعة المعروضة..ويقلن فرجوني كمان، ويسالوا البياعين اذا بيرضوا يشوف والبياعين يوافقوا وهنن يتضحكوا وعم يدعولن بلقاء قريب..لدرجة انو الولد طلب يحكي مع بياع ختيار وسالو عن حالو وعن السوق وكلشي وعايدو كانو عم يعايد ابوه..
الام سحبت التلفون من ايد زوجها وقالت لابنا ليك هون في ملبس عراس..ندر علي لاعملك الف صرة يوم عرسك! وتضحك..والابن يقلها سمعيني صوات الناس وهي تقلو الله يوفقك. الله يرضى عليك..الله يهنينا فيك..
بنص السوق وقفت الام مزهزهة وقالتلو : ليك ابوك بدو يشتريلي سكر على سوس وضحكت كانها عروس …
وبس سكروا التلفون قالت الام للأب : الحمدلله فرحت كومايات وحسيتو كان معنا بالمشوار…الاب قلها لا والله انا حتى ريحتو ماشميتها..
#سلوى_زكزك
