#لارا_حداد: اتحول انا لقاتل متسلسل وافتح شركة استيراد وتصدير/ قتل واغتيال؟


Lara Haddad لارا حداد

فشة خلق تنفيسة قبل ما تلموني من المخافر 😂
عم اتناقش مع انسان ذكر على موضوع، فجأة بيقلي: سكريلي على النقاش بدي روح على شغلي.

طلعت بالميكرو قعدت جنب انسانين ذكور، دفعت نفس الأجرة، اخدوا محلاتهم ونصف محلي واللي جنبي لزقان فيني بشكل مزعج. قلتله خود عليك! قلي بنبرة عالية: شو بدك اقعد بحضن اللي جنبي! قلتله بنبرة أعلى: قله للي جنبك خود عليك! نط اللي جنبه قلي: شو بدك اطلع من الشباك!

اجا لعندي زميل معلم ذكر متخرج جديد وسألني: عندك دليل المعلم؟ قلتله ايه طبعا. قلي: حطيه ع فلاشة وجيبيلنا ياه، بنبرة اقسم بالله ابي ما حاكاني فيها بحياته. طنشته وهو ما عاد رجع لعندي. بعد اسبوع بيجي لعندي وبيقلي بنفس النبرة: ليش ما جبتيلي الدليل!

واقفة بالباص وواقفين معي نسوان صبايا وختايرة، والباص من ورا مليان ذكور قاعدين ع الكراسي عم يتطلعوا فينا بكل بلاهة. بعد شي ربع ساعة واحد منهم بينكشني من كتفي وبيأشرلي على مقعده. قلت بقلبي: والله ظلمتن لهالنسوان لسا فيهم كم زلمة! ألاقيه عم يبعق للشوفير: نزلنا هون.

ماشية بالشارع وفي ذكر قاعد ع الرصيف قدام محل. مرقت بنت وانحنت لتجيب شغلة من الارض وقعت منها فبين شوي من ضهرها وملابسها الداخلية، انا درت وجهي وغضيت بصر عنها واجا بصري بوجه الذكر اللي قاعد، وكان عم يتأمل بمؤخرتها. مرقت مرا بالاتجاه المعاكس بلبس شرعي محتشم صار يبحلق بمؤخرتها كمان. غطيت مؤخرتي بشنتايتي وضليت ماشية.

عنا متجذر بعقلية الذكر السوري ان الأنثى سخرها له الله كما سخر له الأنعام والدواب ليستغلها. هيك بيتعلم من امه وابوه اللي مفهوم التربية عندهم ينحصر بعلف الولد والتكرم بارساله للمدرسة وضربه لما يخالف اوامرهم. مأساتنا أخلاقية ضاربة في العمق لدرجة تلات ارباع الناس ما شايفين انو في مأساة اصلا.

شو الحل؟
1- تتخلى الأنثى عن أنوثتها وتتحول لذكر؟
2- تتعامل الأنثى مع الذكر كشيء مسخر لها؟
3- نطلب من رئيس كوريا الشمالية يستعجللنا شوي بالصاروخ؟
4- اتحول انا لقاتل متسلسل وافتح شركة استيراد وتصدير/ قتل واغتيال؟

شو بتقترحوا حلول غير حل “خلينا نرجع لديننا وقيم الاسلام” لأنه تلات ارباع الناس شايفين انفسهم مسلمين بمجتمع اسلامي طالما اختهم محجبة ما بتحكي مع شباب والمثليين مخفي حسهم والأذان قائم في المساجد.

This entry was posted in الأدب والفن. Bookmark the permalink.

Leave a Reply

Your email address will not be published. Required fields are marked *

* Copy This Password *

* Type Or Paste Password Here *

This site uses Akismet to reduce spam. Learn how your comment data is processed.