كل مادة لها تاجر: #سوريا مافيات

Amal Eliass
كل مادة لها تاجر:
سوريا مافيات

صرعونا بقانون قيصر والمؤامرةع الوطن. طلعت المؤامرة من أعداء الداخل، وقيصر شماعة ليعلقوا عليها مؤامراتهم.
من 4 شهور تقريباً بلشت أزمة علف الفروج. وأصحاب المداجن طالبوا باستيراد العلف. وتم تجاهل الأمر، فاضطر معظم أصحاب المداجن لبيع الأمهات من الدجاج للأكل، وهيك ما ضل تفريخ صيصان. وصارت المداجن تسكر وحدة ورا التانية. وبلش يقل وجود الدجاج وبالتالي ارتفع سعره بشكل جنوني.
وقبل ما يفيق الشعب من الصدمة، تم استيراد الجاج المجمد. وطرحه بالأسواق، وبصالات المؤسسة السورية للتجارة، وبسعر رخيص.
ع أساس قانون قيصر … وصعب استيراد العلف؟
كيف تم استيراد الجاج المجمد؟؟؟
عفكرة مو معروف تاريخ دبحه لأن سهل اللعب بالتاريخ.. متل العادة.
وما بستغرب والله لا يسامحني ع نيتي العاطلة، مايكون نفس الجاج المجمد منتهي الصلاحيه اللي تم الكشف عنه بلبنان، ما بستغرب يتم صفقة حقارة بين الإخوة زعما المافيات بين البلدين، واعادة توزيعن بالسوق السورية. أو أي صفقة من اي بلد تاني.
أساساً الجاج المجمد بلا ريحة متل أي شي مجمد. وبما انه مافي رقابة حقيقية، ولا في ضمير، ما بستغرب شي.
كان ممكن استدراك الكارثة قبل 4 شهور باستيراد العلف….ولكن…؟؟؟
سؤال برسم المعنيين الشرفاء: لمصلحة من إفقار مربي الفروج؟
لمصلحة من استيراد الجاج المجمد؟
لمصلحة من تحويل البلد من بلد منتج للحوم والبيض والخضروات، إلى بلد مستورد لهم.. بلد مستهلك فقط.؟
عم يعملوا فينا متل ماعملوا بالعراق لما تم تسميم نهر دجلة ومات كل السمك، حتى يستوردوا سمك مجمد. وتحول العراق من بلد منتج للحوم الأسماك لبلد مستورد لها.
وهيك…….

وهيك … عم يتم التخطيط لتحويل سوريا.
انتبهوا يا أصحاب الضمير…
اصحوا يا أهلي السوريين الشرفا…
اللي عندو شبر أرض يزرعها… واللي عندو مجال يربي جاج وأي حيوانات يربي.
ع الأقل بتاكلوا وبتطعموا ولادكن شي نضيف. وممكن تبيعوا منها ويكون مورد رزق إلكن ولاولادكن.

والله يسترنا من القادم….

ملاحظة: الصور من النت مو تصويري.

أمل……..

This entry was posted in ربيع سوريا, فكر حر. Bookmark the permalink.

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.