كإمرأة ببلد متل #سوريا ماني آخدة كل حقوقي #أجمل_ما_قيل_في_الجندر

كإمرأة ببلد متل #سوريا ماني آخدة كل حقوقي #أجمل_ما_قيل_في_الجندر

كإمرأة ببلد متل #سوريا ماني آخدة كل حقوقي #أجمل_ما_قيل_في_الجندر
براء صليبي Bara Salibi
هل تعلم عزيزي الرجل إني كإمرأة ببلد متل سوريا ( مع إني بنت بيئة منفتحة وعائلة بتقدرني كإمرأة، وعايشة حياتي متحررة ومستقلة ومن حقي كتير شغلات) ماني آخدة كل حقوقي،
رح أعطيك مثل:
أنا اليوم لو متزوجة وقرر زوجي الحباب يطلقني بدون سبب هيك بيقدر بكل بساطة متل شربة كاسة الشاي الأكرك العجم يقلي باي، وياكل حقوقي ويرشي المحامي، وياخد ولادي يذلني فيهن لإتنازل عن كلشي.
أما أنا لو طلبت الطلاق رح قضي عمري على بواب المحاكم وحط كلشي معي مصاري ونسترضي خاطر أبو عنتر.
مثال تاني: أكتر من نص نساء بلدك ما بيورثوا لأن عيييييب يروح الورث للصهر الغريب، وإذا ما في صهر وولاد شو لازمها البنت من الورثة؟!
أنا كإم مابيحقلي في حال غياب الأب (لسبب خارج عن إرادتي، ممكن يكون مخطوف ، ممكن يكون ميت، ممكن يكون مقرر يسافر وينسانا) قرر مصير أولادي، بس عمهم أو جدهم أو حتى ابن عمهم (المهم ولي أمر ذكر) بيقدروا يتحكموا بحياتي وحياة ولادي ويمنعوني سافر أو سجل ابني بمدرسة بختارها..
أنا عيب اتزوج إذا صار طلاق أو وفاة شريك بس هوي لو متت أو تطلقنا يقبرني بيرجع عريس خلنج.
أنا شهادتي تعتبر نص شهادتك مع أنو يمكن كون أهيب أذكى أكثر كفاءة منك.
أنا لو تعرضت لحملة تشويه سمعة بتروح عليي إنت رجال ما بيعيبك.
أنا إذا تعرضت لتحرش أو إعتداء جنسي، القوانين بتسمح للمغتصب يصير بريء بحال وافق ( الحمدله يا ربي) يستر عليي
أنا لو قرر أي ذكر بالعائلة ينتقم مني بيقدر ببساطة يشوّه سمعتي ويطلعني عايبة وحقّي رصاصتين والجيران رح يقولوا: لو مو عاملة شي ما رح يتبلوا فيها، والقانون رح يقول جريمة شرف وعذر شريف..
عدّلك لسه ولا كافي؟!


وهل تعلمي عزيزتي المرأة قديشني مروقة على هالحفلة وما عندي مشكلة تعتبرينا قطيع هالمرة بالتحديد..
ويا ستي لا مو تطبيع مع المشكلة لما بسخر منها..
وإنما فرصة، فرصة لوصّل بالسخرية عمق مشكلتي اللي ما وصلت بلا هالترند لهالكمية من الناس وأرقت البعض وزعجتهم….
خليكي إنتي فوق هيك بالعلالي أفهم وأحسن مننا ونحنا ولاد الشوارع عم نلحق رزقنا من هاشتاغ ونحلم بالعدالة الإنسانية
ومبسوطة ع جلقة هالترند
إذا ما بدن اللي عم يقرأوا وهنن عم يضحكوا يقدروا حجم الألم اللي عم نعيشه ونسخر منه، ويضلوا سطحيين مشكلتن، أنا عم عوّل على 10 من مليون..
#أجمل_ما_قيل_في_الجندر

This entry was posted in الأدب والفن, ربيع سوريا. Bookmark the permalink.

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.