قضية دكتور جامعة الفرات: الدين أمرنا بستر الفضيحة

صور ة ارشيفية لطلبة من جامعة دمشق

#ستر_الفضيحة
بعد قضية دكتور جامعة الفرات، سمعنا عشرات الناس الي عم تطلع تحكي عن الدين كيف أمرنا بستر الفضيحة.
ستر الفضيحة يا عزيزي، لما تشوف مكالمة بين زميلك وزميلتك بالجامعة، وتكون ذات طبيعة جنسية، لما تشوف جارك وجارتك عالدرج بوضع “محرج”.
بس لما تكون الفضيحة مخبية وراها انتهاك، فإنت بسترك الها عم تستر عالانتهاك. لما تكون العلاقة قائمة على التراضي بين شخصين عاديين، وقتها استر قد ما بدك، ونحنا معك ومندعمك.
بس لما نكون كنساء، وكمواطنين ومواطنات عموماً واصلين لمرحلة من الخيبة بنزاهة المؤسسات ببلدنا، ومنعرف حجم استفحال الفساد فيها، ولما نكون منعرف مدى صعوبة الخوض بشكوى تحرش على المرأة ببلد ما فيها نصوص قانونية واضحة بتخص التحرش، ولما تكون طالبة جامعة بدها تشتكي على دكتور وراه أكيد ناس بيدعموه وعنده علاقات أوسع بكتير منها، لما ننحط بهي المواقف فما عنا حل غير السوشال ميديا، لأنه القضية إذا ما تحولت لقضية رأي عام وصار فيه ضغط جماهيري، ما رح يتم التعامل معها بحذر وجدية منفتقدن عادة لما القضايا تكون مخباية.
لما يكون ما فيه قانون نزيه وسياسات واضحة بتدعم النساء، رح يضل التشهير بالمتحرشين وخاصة أصحاب النفوذ منهن أداتنا الوحيدة.


وأنا مع فكرة أنو من حق الإنسان يحافظ على سرية هويته، بس لما نكون بموقف فيه إما سرية هوية المجرم #أو راحة وأمان عشرات الطالبات اللي بيدرسهن دكتور متحرش عم ينتفع بمنصبه، فوضوحاً رح أختار أمان الطالبات، وإذا كنت ما رح تختار هالشي ولهلا عايش قلق وخايف على المتحرش فموقفك مشكوك فيه للغاية.
معلش، خلي دكتور جامعة عم يستغل منصبه ليكتسب منتفعات جنسية، خلي شخص عم يتصرف بقذارة وانعدام أمانة يتعاقب ويصير عبرة لكل دكتور عم يمارس نفس هالشي هلا بهاللحظة عطالبة من طالباته، بحب ذكركن أنو نحنا ما عم نفضح شخص سرق قداحة!
يا ريت هالرأفة نشوفا على شي بنت غلطت بنفس الطريقة اللي منشوفها فيها على رجل تحرش واستغل منصبه.
#ريم_محمود
#نسويات_سوريات

نرجو متابعتنا على فيسبوك وتويتر بالضغط على الايقونتين
This entry was posted in الأدب والفن, ربيع سوريا. Bookmark the permalink.

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.