قانون الحشمة: فرض غرامه ماليه على كل من ترتدى أو يرتدى ملابس غير محتشمه

( غادة عجمى )
طبعا أكيد كلكم فاكرين ( وصله الردح ) اللى قامت بها ( عضو مجلس البزرميط المصرى ) و ( وكيله نائب لجنه العلاقات الخارجية بمجلس البزرميط ) للحقوقية الفرنسية الجميلة ( كلير تالون ) خلال برنامج حوارى عن حقوق الإنسان على شاشه قناة ( فرانس 24 ) عندما قالت للحقوقية الفرنسية ( حقوق الإنسان دى عند ماما مش عندنا )
و هى بردوا نفس ( النائبة ) التى تراجعت عن مشروع قانون ( حظر النقاب ) عندما أستسلمت للضغوط السلفيه عليها و من الأمن كذلك و سحبت مشروع القانون .
الآن :
كل الصفحات و الجروبات تتكلم عن ( قانون الحشمه ) التى قدمته لفرض ( غرامه ماليه ) على كل من ترتدى أو يرتدى ملابس ( غير محتشمه ) !!!!
و رغم إن مجرد تقديم مثل هذا القانون مخالف لمواد الدستور و يتدخل مباشرة فى الحريات الشخصية و لكن عادى من أمتى و هناك إحترام لأى شيئ فى البلد ؟؟
و علشان بس اللى حيقول إشمعنى ( النقاب ) مش حرية شخصية ؟
لأن ( النقاب ) يخفى هويه الشخص عن من حوله و هو زى تنكرى يتنكر فيه الإرهابيين و اللصوص و الفجره و خاطفى الأطفال و القتله و يعتبر خطر على أمن المجتمع و الدوله .
المهم :
يعنى إيه ( حشمه ) ؟؟ و كيف تحدد ؟؟ و على أى معيار ؟؟
فالمنقبه مثلا تعتبر المحجبه غير محتشمه !!
و المحجبه التى ترتدى فساتين تعتبر المحجبه التى تلبس بنطلون غير محتشمه !!
و المحجبه التى ترتدى طرحه على بنطلون تعتبر المحجبه التى تلبس تربون و يظهر شعرها غير محتشمه !!
و التى ترتدى التربون تعتبر من غير المحجبه غير محتشمه !!
و غير المحجبه و لكنها لا ترتدى القصير تعتبر عير المحجبه و ترتدى القصير غير محتشمه !!
و غير المحجبه و لكنها لا ترتدى المايوه تعتبر غير المحجبة و ترتدى المايوه غير محتشمه !!
و ما ينطبق على السيدات سوف يطبق على الرجال أيضا !!


فا من يرتدى قميص مفتوح الصدر سوف يعتبره من لا يفتح أزارار القميص غير محتشم و من لا يرتدى الشورت سيعتبر من يرتدى الشورت غير محتشم !!
و تبص نلاقى أنت ماشى مع مراتك و لا بنتك و حد يشوف اللى ترتديه غير محتشم من وجهه نظره يجرجركم على القسم علشان تدفعوا ( غرامه )
و بطلات مصر فى ( السباحه . السباحه الإيقاعية . الإسكواش . التنس . السله . اليد . القدم . الطائرة . و مثلهم فرق الرجال يعتبرهم البعض غير محتشمات !!!! و يطبق عليهم القانون الغبى !
و من يريد يسبح فى البحر أو البيسين يلف نفسه فى ملايه لف علشان حيكونوا غير محتشمين فى نظر القانون !!
و الممثلات و الممثلين و المطربين و المطربات و الراقصات بعد كده حيمثلوا بالجلاليب و يغنوا بالبيجامات و يرقصوا بالنقاب علشان مايدفعوش غرامه كل شويه !!
و اللى بينزل صورته غلى مواقع التواصل يتأكد أن مافيش حاجه باينه منه لحسن يدفع غرامه علشان ( الغبيه غادة عجمى ) شايفه إنها حارسه الأخلاق و المظهر العام و شخصيا أنا بشوف إن (صورها ) غير محتشمه !
أه ما خلاص بقى الكل يتدخل فى إختيارات الكل و نبقى ( هيئه أمر بالمعروف و النهى عن المنكر ) اللى عايزه تستنسخها فى مصر من الوهابية التى لفظتها و أنهتها !!

About رشا ممتاز

كاتبة مصرية ليبرالية وناشطة في مجال حقوق الانسان
This entry was posted in دراسات سياسية وإقتصادية, ربيع سوريا. Bookmark the permalink.

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.