عتاب واحد مصري … لبابا الكاثوليك

البابا يغسل اقدام اللاجئين السوريين ويقبلها

طيب بالذمة الراجل دا بتقال عليه أيه ؟
هو أنت بتعمل كدا ليه يا بابا ؟

هو أنت قاصد تحرج كتير من الأساقفة والكهنة ؟

يا قداسة ألبابا تصرفاتك الغير مسؤولة دي
بتخلي شكل كتير من الأساقفة والكهنة وحش جداً ؟

يعني وانت “كاردينال” كبير أساقفة ألأرجنتين
تبيع عربيتك الفوكس فاجن وتتبرع بتمنها للفقراء
وتقضي مشاويرك بالمترو والمواصلات العامة ؟

يختاروك بابا .. تطلب من شعب الأرجنتين الفقير
أنه بدل ما يسافرو وبيجوا للفاتيكان لحضور تنصيبك بابا
أن يجمعوا تكاليف سفرهم ويتبرعوا بيها للفقراء والمحتاجين
ويتفرجوا عالاحتفال في التلفزيون ؟

حتى أختك الوحيدة سمعت كلامك وعملت كدا ؟

ترفض أن يكون خاتم البابوية بتاعك
يبقى من دهب أو حتى من فضة
وتطلب أن يتعمل من معدن رخيص ؟

ترفض إرتداء الحذاء البابوي الأحمر
وكمان ترفض الإقامة في المقر البابوي
وتأخذ بدل منه أوضة صغيرة في أحد ألاديرة ؟

ترفض حرسك السويسري يفضّل واقف
على رجليه وقت الحراسة
وكمان تقوم بالليل تعمللهم سندويتجات
عشان يأكلوها أثناء نوبات الحراسة ؟

تنزل محل نضارات بنفسك وتطلب عدسات
للنضارة بالكشف الجديد
وتطلب إنها تتركب على الشنبر القديم
عشان ما تصرفش من فلوس الكنيسة
على نفسك وتوفرها للفقراء ؟

يصوروك في زيارتك لمصر ويكبرو الصور
يلاقوا أن ألكم في هدومك منحول
علشان يمكن عندك طقم واحد أو طقمين بتغير فيهم ؟

وكمان شافوا نعل جزمتك متآكل من الاستعمال
لانه جوز جزمة قديم ووحيد ؟

طب شركة لامبورغيني تهديك عربية من إنتاجها
قيمتها شيء وشويات
تقوم تعلن تمسك بالعربية الفيات القديمة
ولا …
كمان تعمل مزاد على العربية المبرغيني
المصنوعة خصيصاً ليك وبتجهيزات خاصة
وتتبرع بتمنها للفقراء ؟

لا دا كتير يا بابا .. حرام عليك
كدا خليت شكل كتير من الأساقفة والكهنة وحش جداً ؟

هُو ليه أنت عامل زي المسيح {مقلق ، ومزعج ، ومش مريح} ؟
وكمان مصدر العكننة على الاشرار ؟

ما تمشي حالك زي غيرك .. ما تعمل زي ما بيعملوا يا أخي ؟

هُو إيه الفرق بينك .. وبين الناس التانيين ؟

++
الفرق أنك باصص على راعي الخراف الحقيقي
{السيد المسيح} ؟

وهما باصين على الخراف نفسها
عايزين يبيعوا صوفها ، ويشربوا لبنها ، وكما بيأكلوا لحمها
هو دا الفرق ؟

أنت مثال حقيقي للإنجيل المعاش
عشان كدا عمرهم ما هـيبقوا زيك ، ولا انت تقدر تبقى زيهم
يا بخت كنيستنا بيك ؟

منقولة عن كاثوليكي مصري ؟

About سرسبيندار السندي

مواطن يعيش على رحيق الحقيقة والحرية ؟
This entry was posted in الأدب والفن. Bookmark the permalink.

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.