طلقها يا ابو حسين!!!!!!(للسيدات)

الكاتب السوري اشرق مقداد

“ابن عمييييييييي”
ياروحو أمر؟
“أنا من بكره رح بلش ريجيم”
حلو بنت عمي وانت من بكره طالق!!!!!!!!
ولا في شي بخاف منو أكثر من لما “ست الحسن” تعلن (ودائما الصبح) لما “تكتشف أنو هي بحاجة “ريجيم” وإنها رح تبلش تعمل ريجيم يا أخا العرب!!!!!
هلا رح ينطوا ويقولوا :” اي وشو دخلك”؟ “بدال ماتشجعها” “بدها تحلوّ اكثر منشانك”!!!
ياسيدي مارح عمم بس تعوا لأشرحلكم ليش موقفي هذا
اولا متزوجين من ماقبل الميلاد وعيني مو زايغة ومسحّب السحاب وقاعد على سجادة صلاتي ومافي سبب ابدا أنا “سببت فيه” لحتى جنابها “تقرر” انو رح تضعّف حالا “منشاني”!!!!!!!!!!!!
فإذا “منفعتي” ومصلحتي هي المقصودة فما الي مصلحة او منفعة وأنا “رضيان بقسمة الله واسم الله حولي وحوالي ويللي بعمري وبقدري “الشكل لابيزيد ولا بينقص” بحيث الأمور هادية على الجبهات ويادوب بالخمس سنين يصير “تحرك على الجبهات”
اذكركم أنو هذا “الإعلان” عن الريجيم هو الثالث بعد المليون وليس اول او حتى المرة الألف يجب علينا أن نذهب للخنادق
حرمتي . عيلتي. مدامتي. بنت عمي. البيت. زوجتي” فرع الأمن. المساعد جميل لا تدخل نفق “الريجيم” وحدها فعندما هي بالريحيم ندخل كلنا وبدون حدا مايسألنا بالريجيم بحكم مراكز القوى (والله على القوي)
وكلنا سنبدأ بأكل الحشيش والخيار والجزر والسالري والدايت مشروب
ولازم “نسدّوا” ومارح نفتح الباجوق بحيث يجب ان ندخل الريجيم كعيلة ونخرج منو كعيلة !!!!!!!!!!!!!!!!!!!
السؤال الذي لا أسترجي سؤاله هنا:” اذا انا جوزك والوحيد يللي بيهمك وأنا مبسوط بشكلك لشو هالريجيمات؟؟؟؟؟؟؟؟
قال منشانها هي ومشاعرها وثقتها بنفسها
طيب وشو منشانا نحنا (أنا والأولاد) ومشاعرنا بالجوع واصوات خوير المعدة
وبعدين أنا مبسوط بكرش الوجاهة ومابدي لاصغّروا ولا نحفوا (عندي ثقة بالنفس) ومنشان الكولسترول والسكري ماشالله الحبوب مليّة الحمام وكفى المؤمنين شر القتال!!!!


احلى شي بتصير تطلع لتمشي هي ورفقاتا واول كم يوم حلو……بعدين بيبلشوا يختفوا وبيصير ما في بالميدان الا حديدان وأن لازم اطلع اركض معها!!!!!!!! وأنا ماوقعت على اي عقد وبريء يابيه
الريجيم رجس من عمل الشيطان فاجتنبوه……وفرجوني وحده من حريم الرسول الأعظم سوت ريجيم وسمعنا عنو……..فمعناه الريجيم هو بدعة وكل بدعة حرام
يا ابو حسين اذا فاقت مرتك واعلنت انها “رح تعمل ريجيم” أمامك عدة من الخيارات احلاهم مرّ:
طلقها وبهذا تنفع المؤمنين بحيث ستنتشر القصة و”تنضب” النسوان” ويعملوا ريجيم بالسر ويامعدة مادخلك شر
تعاقد مع ابو عبدو اللحام يعملك وجبات سرية الك والاولاد تأكلها عندو
خبي شي تورتة او كيكة اوفطاير بطبون السيارة وكل شوي اطلع اتطمن على “الجنينة”
بلش اتفرج على برامج صناعة الحلويات واستمتع بعذابها وببرنامجين شوف شلون رح تلغي الريجيم
الله يقدرني على عمل المعروف واتعلموا باشباب
جمعية الرفق بالرجال
اشرف المقداد

نرجو متابعتنا على فيسبوك وتويتر بالضغط على الايقونتين
This entry was posted in فكر حر. Bookmark the permalink.

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.