شو هالشعب اللي مابيعرف طعمة تمو ؟

Bassam Yousef

بالسويد…
البواب مابتخرب، محسوبة ع الميليمتر، والشبابيك أيضا، والكهرباء ما بتنقطع، بتحاول تعرف من وين واصلة الكهربا ع البناية اللي انت فيها ما بتعرف، المية ما بتنقطع ابدا، سواء المياه السخنة أو مياه الشرب، والحنفيات ما بتنقط، ولا بتنزل مية الصرف الصحي من عند الجيران عليك انت اللي ساكن تحت، والتدفئة ما بتعرف شي عنها إلا إنو بيتك دافي.
إذا بدهن يعملو أي صيانة بالكهربا أو المي بيخبروك قبل بأسبوعين، وبيحددولك بدقة الوقت اللي ممكن تنقطع فيه، وغالبا ما تعود المياه والكهرباء قبل الوقت الذي حددوه.
زفت الطرقات بيضل 40 وخمسين سنة ما بيتحفر، وإذا تحفر بيصلحوه بسرعة فائقة وبجودة عالية.
ما في شخص بالسويد بدون عنوان واضح، وكل معاملاتك بإدارات الدولة فيك تعملها انت وقاعد ببيتك ع النت، ماعدا التي تتطلب التأكد من الشخصية مثل جواز السفر أو الهوية و..


النت ممتاز … ولم الزبالة بتحس فيه انو المواد اللي عم يلموها مو زبالة، والعاملين بهاد المجال نظيفين وشباب وصبايا رايقين وحلوين..
البريد تبعك بيوصلك يوميا على باب بيتك، وقص العشب بالحدائق ما بيصير يتأخر وزرع الورد و..و..
….
….
وبس اجتمعنا نحنا السوريين مننفخ ومنتذمر .. ومنقول:
شو هالعيشة .. ؟؟!!… يارجل شعب مابيعرف ياكل …
فعلا … شو هالشعب اللي مابيعرف طعمة تمو ؟؟؟!!!.

This entry was posted in الأدب والفن, ربيع سوريا. Bookmark the permalink.

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.