يا ريتني ماكرون بالجرأة.. وإطلع وبهدل كل هالفرقة
#فارس_اسكندر #وجع_المصاري
يا ريتني ماكرون بالجرأة
وإطلع وبهدل كل هالفرقة
وهاك الزعيم الرجّف الآلاف
يرجف قبالي متل شي خرقة
بعمري ما شفتو من حدا بيخاف
واللئمنة بعينيه مختنقة
عليه البهادل نازلة نفناف
موطّي الرقبة البدّها خنقا
قوم جاوب فرنسا انتفض وقاف
اسفقلك خطاب و طلّع الورقة
ولّا علينا بتعملوا أشراف
وهلق سوا اجريكن بهالفلقة
إنتو قوايا عالبشر الضعاف
وبين الدول لازملكن حلقة
تقال بالأوزان بس خفاف
حجار ضامة كروت محترقة
٢٠٠ ضحية وسبع تالاف
جرحى وبدك كرستَك تبقى ؟
كلبة تشيلي عندها إنصاف
وشفقة بقلبا وإنت بلا شفقة
عملتو حكومة بسرعة الإسعاف
وبرغي الفرنسي فات بالعزقة
قصر الصَنوبر لو حكي شو شاف
كيلو الصنوبر كان صفي بورقة
مش مسألة تقليد أو أعراف
ولهفة الإستقبال والملقى
وجع المصاري لغى أيّا خِلاف
وجع المصاري جمّع الرفقة
كل بنك بسويسرا بِ نهبَك طاف
وبنكَـك سرق جنى عمرنا بحَـرقة
وقلبك على الأموال رح يوقاف
مرعوب منك ياخدو كل شي
ويروح سرقة اللي إجا سرقة …
