#سارة_العظمة: تجربتين مريت فيهن السنة غيروني باقي حياتي.

الناشطة السورية سارة العظمة

Sara Azmeh Rasmussen
طعم الغدر مرّ
يا محلا الشر لما يكون عاري، مو لابس توب حمل وديع ومسكين.
وقتها بتصير المسألة بسيطة. والحسابات سهلة.
المشكلة بالاحتيال والخداع والغدر أنو الضحية بدل ما تضمد جروحها بترش عليهن ملح كل شوي… بتصير مذنبة. طبعا مذنبة! كيف تسمح لحالها تخوض هيك تجربة؟ معناها هي غبية معتوهة وبتستاهل.
المشكلة هي أنو لما الضحية تقوم وترجع تمشي ، وتصدف حمل مجروح واقع بحفرة رح تتذكر اللي صار وتفكر أنو الأمر خدعة وتتجاهل…. الحمل الحقيقي.
المحتال شره بيصيب كتير أشخاص ولمدة زمنية طويلة جدا.
بيعمل خلل بالعلاقات. بيقتل الثقة بالنفس والغير. والحياة.
والبشرية.
صرت أهرب لعالم الحيوانات… أتفرج ع فيديوهات الرفق بالحيوان وعمليات إنقاذهن. بيكونوا مسطحين عالطريق بإصابة أو مرض أو جوع، وبعدما حدا يساعدهن ويوقفوا ع رجليهن بيشكروا….
ما بيكذبوا
تجربتين مريت فيهن السنة غيروني باقي حياتي.
قصة عميل مخابرات النظام السوري صارت معروفة والهدف كان تخريب مشروع أوغاريت … للأسف صار عندي خوف غير منطقي من المصريين (كان مصري) ما عدت أقبل طلب صداقة مصريين ولا طيق أسمع لهجتهن ولا شوف أخبار مصرية، ولا عاد بدي زور مصر…. علما كان هالشي حلم عندي.
القصة التانية والأخيرة…. لأنو مستحيل أسمح لنفسي أوقع كمان مرة! هي التالية:
حنيت على شب تعرفت عليه عبر الفيس بوك من أكتر من ٤ سنين. ع أساس يتيم، اكتشفت بعدين أنو أبوه وأمه عايشين.
بقاع الفقر وكان يشتغل عتال بمصنع كرتون. أشغال شاقة ومستأجر غرفة بالبراري بأطراف الضمير.
خليته يترك الشغل ويبلش جامعة. دفعت علاج سنانه ٥٠٠ دولار. كان بحياته كلها ما فات عيادة طبيب سنان. دفعت عملية كمان كان كتفه مخلوع. عاملته متل ابن. صرفت عليه طول الوقت. بعتت له تياب كسوة كاملة وأحذية جلد من عندي بالسويد.. غالي بس جودة. طلب موبايل حقه ٥٥٠ دولار دفعت له بعد تردد. قلت لحالي حرام طول عمره بيشتهي ومحروم خليه يشوف حاله. انا موبايلي ب ٢٠٠ دولار مع اني بالسويد اشتريته مستعمل.
بالأخير صار يشكي انو السقف هر و عم يغرق بالطين وما في طريق لبيته. قلت له استأجر وسط البلد. قال أوفر لو انا اشتريت من اني ادفع أجار. ع أساس في شقق ب ١٠٠٠ دولار. قلت له ماشي.
راح لف قال عجبه بيت بوسط البلد سعره ٤٣٠٠ دولار.
وضل يحاول يقنعني انو البيت غير عيشة، وهو استثمار إلي.
بعتت المبلغ. فجأة قال ما بقدر سجله باسمك بتصادره الدولة لأنك معارضة. وما بسكن فيه اذا باسمك بخاف تسحبني المخابرات. خليه باسمي وهو تحت أمرك ايمتى ما بدك بينباع. هو بيتك.
قلت ماشي. انا بثق بالناس وهاد ٤ سنين انا متكفلة فيه. صدقت.
قال بدو نفض. بعتت مصاري تبليط، مطبخ سيراميك، أحلى حمام ودوش وكمان سيراميك وخزاين. وبعتت ورق جدران من السويد نوعية أولى المتر ب ٧٠ دولار بيضاين وبينغسل وبيتحمل مي. تكلفت بلاوي، لوحدها كلفة البريد ثروة . ومن قلبي بدي يرتاح وينبسط. ع أساس صار إلي ابن بيربطني بالبلد. بيستقبلني بالمطار إذا الله فرجها وقدرت زور البلد.
قال بدي أخطب حبيت بنت قلت له مبروك. بعتت ٦٠٠ دولار للخطبة. تزوج وسكن.
وبطل يحاكيني ونشف. أكتب له ما يرد. زعلت وقاطعته.
مرت سنة ونص وانا صار معي أزمة كبيرة وتدايقت ماديا.
كتبت له بدي بيع البيت وبعطيك ٣٠% من حقه تشتري شقة. ما بدي أرميه بالشارع مع أنو طلع ندل وعديم أصل وشرف.
رد اي حاضر ببيع. تكرمي.


مر أسبوعين رجعت سألت. قال السوق واقف. وبلش يبهدلني.
قال أنا استغليته أبشع استغلال!!! وعبيت فراغي. وأخدت من وقته! استغليته!
أنا كنت حن عليه واسأل كيف دراسته وصحته . وكان هو بالنسبة الي صلة وصل بالشام. يعني تعويض عاطفي.
انا درست حقوق وهو ع فكرة كمان درس حقوق ع حسابي. بعرف أنو القانون لا يحمي المغفلين.
أنا غلطت. ما في دليل على الاتفاق الشفهي انو البيت بيتي وهو ساكن فيه ببلاش.
البيت صار باسمه ملكه.
حاسة حالي انطعنت بضهري وقلبي سوا. محتاجة المبلغ كتير كتير، بس الدافع اللي بيخليني مو قادرة أسكت هو أنو هيك ظلم مو طبيعي.
هي مو بس سرقة… هي سرقة انسانة لعبت دور أم ولمت شب من القاع واشترت له صوبيا وحطب وأكل وشرب ولبس وكتب ٤ سنين.
حظرني وبدّل رقم موبايله، اللي حقه ٥٥٠ دولار من جيبتي.
بسعر موبايله بس كان فيني أطلع إجازة أسبوع رفّه عن حالي.
بس اخترت خلي غيري يرتاح. ويفرح. وكان عندي فكرة غبية عن أهمية وقيمة تغيير قدر إنسان، من استمرار بؤس لجعله قوي وقادر
كنت مستعدة أعطي بدون حدود . كتار غشوني . طلاب كذبوا. ما اهتميت. قلت ما رح غير موقفي من الحياة وأخلاقي لأنو في أشخاص أخلاقها ضعيفة.
بس شخصين طعناتهن بضهري وقلبي غميقة كتير.
أجبروني أتغير.
وأفهم
أنو غبائي كان بدون حدود
وأني بستاهل كل شي صار فيني
سارة وصدق بدون حدود

نرجو متابعتنا على فيسبوك وتويتر بالضغط على الايقونتين
This entry was posted in فكر حر. Bookmark the permalink.

1 Response to #سارة_العظمة: تجربتين مريت فيهن السنة غيروني باقي حياتي.

  1. Robert FED says:

    الغباء مصيبه ان كان بالغرام. في حالتك غباؤك بالطن يا رعاك الله. تستاهلي الذي يصيبك

Leave a Reply

Your email address will not be published.

This site uses Akismet to reduce spam. Learn how your comment data is processed.