ماما حبيبتي… يا أصدق وأطهر وأنقى قلب بالعالم…
السرطان الحقير سرقك منا وأكلك ودمرك بوحشية طول هالعشر سنين… ضليتي تقاومي وتقاومي وكنتي كتير خايفة علينا مو على حالك……
بس هو كان أقوى من كل شي…. و ضل ينهش بلحمك وياكل عضامك ويعذبك ويوجعك لحتى أخدك منا وحرمنا منك للأبد….
كتير كنتي آكلة همي وخايفة عليي وصليتيلي ودعيتيلي لحتى تمرق فترة حملي وولادتي بخير….
والحمد لله ما ضلت حسرة بقلبك ولا بقلبي…. اجيت لعندك ع حلب و جبتلك مياس وحطيتو بحضنك متل ما كنتي حابة ومياس كتير محظوظ انك حملتيه وضميتيه وبستيه وصليتيلو ودعيتيلو وغنيتيلو….. و أنا كمان ارتحت اني ودعتك مبارح و ضميتك و بستك وشميتك و بست ايديكي وانبسطت لما خبرتيني انك رضيانة عليي ولما كمشتي ايدي مشان تبوسيها يا روحي انتي لأنك ما قدرتي تحكي وتخبريني انك بتحبيني…. بس أنا بعرف انو ما حدا بالدنيا حبني قدك…. انتي الحب كلو….. ورح تضلي عايشة جواتي كل العمر…. أنا سكنت ببطنك تسع شهور بس انتي رح تضلي ساكنة بقلبي وروحي وعقلي وتفكيري لحتى موت وارجع التقى فيكي بالسما….. أنا قطعة منك ونسخة عنك بشهادة كل الناس وفخورة اني أكتر وحدة بشبهك …. كلما بطلع بالمراية بشوف صورتك بوجهي….
انتي ما رح تموتي…. انتي قديستي و شفيعتي…. وما عاد عندي واسطة مع الله غيرك انتي…. وصلاتي بس الك…. ما عندي قديس بالدنيا غيرك……
بوعدك دير بالي على صحتي متل ما طلبتي مني ودير بالي على هيفا متل ما وعدتك… وبوعدك نفذ وصيتك وعلّم مياس موسيقا ورح يكون انشالله عازف ومطرب وصوتو حلو متل ما انتي متوقعة… ورح يرفع راسو فيكي ورح يكونوا ولادي فخورين كتير بستهن أيقونة الفن السوري….
الحمدلله الله عطاكي شوية عمر زيادة مشان تقدري تشوفي ولادي وتحمليهن…. مع انو حظ هيفا كان أحسن من مياس انو عاشت معك تفاصيل أكتر وعندها معك ذكريات أكتر….
بس هيك نصيبنا…. وهيك بدو القدر….
وداعاً ماما….. بحبك بحبك بحبك يا وجع قلبي وكوني متأكدة انو ما في شي بالدنيا كسرلي قلبي قد رحيلك ورح ضل مكسورة كل العمر….. ورح اشتقلك كتيرررررر وصوتك صار يوجعني كتيرررر ولسا عندي كتير حكي وكتير قصص بدي خبرك ياها وما شبعت منك…….
