الكاتب السوري زياد الصوفي
رمادي : هي اجت سنة ٢٠٢٢ و لسّا النظام ما سقط..
ثوري : صحيح النظام ما سقط، بس الثورة كمان ما وقفت..
رمادي: كانت حرزانة ندمّر الوطن منشان حرية المواطن؟؟
ثوري : ما في وطن بلا مواطن حر..
رمادي: بدنا ٧٠٠ مليار دولار لإعادة بناء سوريا..
ثوري : قصدك بناء سوريا..
رمادي : طيّب من وين بدنا نجيب هالمليارات لنبني بلدنا؟؟
ثوري : من سيّالة جيوب عصابة الاسد ..
رمادي: و هالمتطرفين كيف بدنا نخلص منهون بعد الاسد ؟؟
ثوري : بيزولو مع زوال أسباب وجودهون..
رمادي : و الأقليات شو مصيرها؟؟
ثوري : ما في أقليات في سوريا، في سوري بأخلاق و سوري بلا أخلاق ..
رمادي : يعني عالقليلة كنّا عايشين ببيوت مو بخيام اللجوء؟؟
ثوري : كنا ببيوت صح ، بس مو عايشين
رمادي : مقطوع ألبي من الانتقامات بعد سقوط الاسد؟؟
ثوري : راهن عأخلاقنا..
رمادي : طيب شو اكتر شي كرهتو بهالعشر سنين؟؟
ثوري : كل ما اتذكّر حالي كيف كنت قبل الثورة..
رمادي : لما بسمع المؤيدين بقول هنن الحق، و لما بسمع الثوريين بقول و الله معهون حق..
ثوري : ما غريب هالاحساس، الثوري عم يحاول ينزع عن كتافو العبودية، و المؤيد أقصى أحلامو انو يحسّن شروطها..
رمادي : يعني رح يسقط النظام ب ٢٠٢٢؟؟
ثوري : النظام سقط من زمان، انشالله هالسنة منقدر نبدأ بالثورة..
رمادي: طيب شو بتتمنّى للسنة الجديدة؟؟
ثوري: انّو تحل عني انت و أسئلتك ، عندي شغل يقطع عمرك..
