حكومة #السيسي في #مصر: افرج عن قاتل مجرم واقبض علي العيله #مودة لانها اكبر خطر علي المجتمع بتحريضها علي الفجور بلبسها ورقصها

البلد محكومه بكماشه العسكر & السلفيين الأنجاس
و السؤال لماذا تغطية وجه الإرهابى ؟؟
الجواب :
علشان ده فى نظر ( النظام ) مش إرهابى !! ده حيالله كان حيدبح واحدة بشعرها بس طلعت مسيحية !!
إيه جريمته بقى ؟؟
إنما واحدة ماحدش يعرفها إلا 1 % من الشعب و لا عمره سمع عنها بتنزل فيديوهات تافهه على التيك توك يهتز ( النظام ) و يرتعش و تقوم الدنيا ما تقعدش و تتعلق المشانق قال إيه خطر على المجتمع !!!!!!
بالذمه دى منظر دوله محترمه ؟؟
……………
1) منذ ساعات النيابة قررت حفظ قضية السيد “ممدوح رمضان طه ” متطرف الوراق المتهم بذبح ” كاترين رمزي ” الذى قام بشد راسها و ذبح رقبتها بواسطة شفرة .
وبعد ما نفذ جريمته وقف فى الشارع مع الناس وقالهم “دبحتها علشان ماشية في الشارع بشعرها”
السيد “ممدوح ” قام بنفس الجريمة مع السيدة ” مارى جميل ” واخد 6 شهور سجن… فالنيابه شافت انه مجرد مختل عقلي مش مسئول عن افعاله كالعادة …

2) منذ يومان أصدرت النيابة العامة قراراً بحبس الشابة مودة الأدهم 4 أيام على ذمة التحقيقات، لاتهامها بالاعتداء على مبادئ وقيم أسرية في المجتمع المصري بعد ان تبين لها انها تشكل خطر جسيم علي المجتمع

الكلام ده حقيقي ومش هزار علي فكرة .. وفعلا مودة الادهم هي الاخطر مش السيد المحترم ممدوح ويجب التخلص منها لحماية المجتمع

مودة فتاه صغيرة ومتحررة بتعمل فيديوهات رقص وتنطيط وليها متابعين بالملايين وتحرر اى مجتمع بيبدأ من تحرر المرأه فيه
مودة بتابعها ملايين البنات الصغيرة ولو البنات دى قررت تلبس زيها وترقص زيها وتتحرر زيها دة هيخلق جو عام من الحريه في البلد كلها ، معني كدة ان اى حد ممكن يمارس حياته زى ما هو عاوز ويعيش حر زى ماهو عاوز
وطالما المواطن وصل انه يكون انسان حر معني كدة انه مش هايقبل الا بقوانين حرة ودستور حر وبمسئولين وحكام علي مستوى الحريه يضمنوله حياة حرة كريمه فيها اكبر قدر من العداله الاجتماعيه … ومعني كدة ان اى فساد واى فاسد هيكون موضع للمسائله والمحاكمة والروس كلها تتساوى في قلب المجتمع الواحد

يبقي لازم يتقبض علي مودة وتتحاكم مودة وتتعدم مودة وتتوئد اى محاوله لتحررالانثي قبل وباء الحرية دة ما يتفشي ويوصل للنساء كلها وللرجال كلهم وللمجتمع كله

احنا عاوزين المواطن جاهل زى ما هو ومغيب زى ما هو فهنفهمه ان قمع الحريات هي محافظه علي شرفه وكرامته واخلاقه وهنرميله المرأة كعضمه يعضعض فيها ويطلع فيها غله وكبته وامراضه ونخلية يسيطر عليها ويقمعها في مقابل ان احنا مسيطرين عليه وقمعينه وهادرين كرامته وانسانيته ونهبين كل حقوقه

يبقي اعمل الصح وافرج عن قاتل مجرم يطلع يكمل مسيرته الاجراميه الدمويه برة واقبض يابني علي العيله اللي اسمها مودة وارميها في السجن واعدمها كمان وقول عنها انها اكبر خطر علي المجتمع بتحريضها علي الفجور بلبسها ورقصها والمهابيل كلهم هيسقفولك ويشيدوا بجهودك الجبارة للحفاظ علي الاخلاق والتقاليد .

Post From : Nivien Monem

This entry was posted in الأدب والفن. Bookmark the permalink.

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.