#تامر_حسني  يصرح إنه يفكر فى الإعتزال لأسباب دينية

الكاتبة المصرية رشا ممتاز

بوست يجمع 3 نقاط نبتدى بالأسوأ للأجمل
1  تامر حسنى  يصرح إنه يفكر فى الإعتزال ل ( أسباب دينية ) !! و يتمنى من الله ألا يموت و هو يغنى !!
جميل أوى بص يا ( تامر ) عايز تعتزل أعتزل من غير شوشره ماحدش حيجرى وراك و لا حيموت نفسه علشان تفضل تغنى أصلك مش ( معجزه ) و لا حد إسطورى علشان الناس تتمسك بيك .
و قبل يا حبيبى ما تعتزل لأسبابك ( الدينية ) مادام شايف إن ( الفن ) يتعارض مع دينك إرجع لقديمك يعنى زى ما كنت بتقول إنك تعبت و كنت بتنام من غير أكل و كنت مش لائى فلوس تركب بيها علشان تذهب للجامعه و كنت بتمشى على رجليك و إن و إن و إن
يعنى ترجع كل ( مليم ) كسبته من الفن اللى مش عاجبك ده و خلاك عايش فى نعيم لم تكن تحلم به منذ 20 سنه و السيدة زوجتك تقفل المشاريع التجارية اللى فتحتها بفلوس الفن و أولادك ال 3 تخرجهم من المدارس الدوليه و تعلمهم تعليمك فى مدارس الحكومه لأن مصاريف المدارس من فلوس الفن و تسيب منزلك الفخم و ترجع تعيش فى بيت الست الوالده اللى شقيت عليك أنت و أخوك لما السيد الوالد ترككم و هج .
يعنى ترجع للصفر اللى كنت فيه و تحذف كل الأرقام التى أصبحت تلمع أمام الأصفار و تتنازل عن سياراتك الفخمه اللى فلوس ( الفن ) جعلتك تستطيع شرائهم و كل الملابس البراند اللى بتلبسها أنت و السيدة زوجتك و أولادك ال 3
أه و ماتنساش و النبى ( ترجع شكلك ) الأصلى علشان ( عمليات نحت الوجه و طبع الحسن ) اللى عملتهم طلعوا يا حبيبى ( تغيير فى خلقه ربنا ) تصدق !!
و كمان ( شعرك المزروع ) رجع صلعتك تانى و أسنانك اللى بقت تنور فى الضلمه دى رجع شكلهم و لونهم الأصلى !
أصل كل ده ( فلوس الفن ) اللى مش عاجبك السبب فيه و خلى بقى ( أسبابك الدينية ) تأكلك و تشربك و تلبسك و تحميك من البرد و الحر و المرض أنت و أسرتك الكريمة .


و بالمره قول لربنا ( يأخذ صوتك ) منك علشان أنت شايف إن ربنا لعنك بالصوت ده و بالتالى واحد نمرود زيك على نعمه ربنا مايستحقش النعمه دى و تبقى تقول لربنا هديتك مرفوضه ( لأسبابك الدينية ) !!!
و إن شاء الله يتوفاك الله و أنت سائق ميكروباص أو بياع فى كشك مش ملكك
2 السيدة الإيطالية اللى الإعلام الساقط كان طالع بيها السما هى و جوزها و فرحانين أوى إنها ( أسلمت و محجبه و عايشه فى الفيوم و أصبحت تعيش حياتها كمحيطها الفلاحى فى الفيوم و عمالين ينفخوا فى جوزها كأنه مثلا عمل إنجاز القرن و حسسونى من كتر غبائهم إن الراجل إحتل إيطاليا و أصبح ملك على روما !!!
السيدة الإيطاليه هجت من البلد و رجعت لبلدها و معها أولادها ال 4 و نصيحه منى ليها لا تعودى أبدا و ربى ولادك فى إيطاليا أفضل مليون مره من التعليم و الحياة وسط هذا المجتمع المريض و يا ريت كمان ترفعى قضية طلاق فى بلدك و تقطعى علاقتك للأبد مع زوجك و مجتمعه اللى خلاكى ( جارية ) و إعلامه كان فرحان بخيبتك .
3 نعود لمحطه مترو ( العباسية ) التى لم تكتمل بعد و كنا نشرنا فى البوست السابق إن حروف اللغه المصرية ترصع المحطه .
نعود نعرض لكم جزء آخر من المحطه يظهر فيها فسيفساء جميلة ل (القديس مرقس ) بشكل جميل جدا و معلومه مختصره عن تاريخ الكاتدرائية المرقسية و أيضا هناك فسيفساء أخرى للقديسة ( فيرينا ) و لكنها لم تكتمل بعد و كل ذلك ينبئ إن هناك تغيير قادم ببطء و لكنه قادم بالتأكيد و نحن سعداء به و نتمنى أن يشمل كافه المجالات و أن تقف الدوله على نفس المسافه من كل معتقدات المجتمع و لا تميز و الرموز التاريخية المصرية تأخذ مكانها اللائق بها و يتعرف عليها كل الشعب لأنها جزء لا يتجزأ من ثقافته .
أما ( الأبالسه ) اللى موضوع زى ده ممكن يعصبهم يا ريت لا يستخدموا مترو الأنفاق و لا يعدوا على محطه العباسية حفاظا عليهم من الشلل الرباعى و التبول اللاإرادى و الخرف المبكر .

About رشا ممتاز

كاتبة مصرية ليبرالية وناشطة في مجال حقوق الانسان
This entry was posted in الأدب والفن. Bookmark the permalink.

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.