بشاركم بهلولكم

Ali Ferzat

قال لي بشار في مكتبه بال2001 وكان ملتهي بجهاز البلاي ستيشن عما يلعب فيه …شو الفكرة اللي قلتلي عليها منشان تطوير الاعلام ؟؟قلت له الفكرة هي انه ليش ماببتسمحوا للصحافة الخاصة بالصدور بعد مااغلقها حزب البعث العتيد ب1963؟؟قال لي ليش شو بذهنك مثلا؟؟ قلت له ناوي اصدر جريدة ساخرة ناقدة مستقلة لانه انت بتعرف بزمانه كان في جريدة اسمها المضحك المبكي وكانت جريدة ناقدة ساخرة مستقلة ..هون صفن شوي وقال لي طيب انت شو بذهنك تنشر فيها مواضيع ؟؟ متل ايش مثلا؟؟قلت له رح قلك شو بدي انشر يااما بتقللي اوك يااما بتقول لي بلا كل هالقصة.. اولا انا رح اتناول حزب البعث المتخشب ومجلس الشعب وتدخل المخابرات بحياة الناس وفرض الأتاوات وسماسرةبيزنس الواسطات وأداء الحكومة الفاشل والقضاء ووصفته (بالقضاء والقدر ) انا ضحكت بس لحالي
لأنه كان مندمج وهو عما يلعب بالبلاي ستيشن وماانتبه لحديثي .قال لي شو بدك تسمي الجريدة ؟؟قلت له الدومري..قال لي ..شو يعني الدومري؟؟ قلت هو الرجل اللي كان يشعل الفوانيس ليبدد العتمة بالليل قبل مايكون فيه كهربا…للحظة حسيت عما احكي مع حالي لانه كان ملتهي بالبلاي ستيشن ..وبتصوري ماكان منتبه لكل المواضيع اللي قلت له عليها من نقد للمخابرات وحزب البعث والقضاء والحكومة.. ويمكن هي الورطة اللي وقعت انا فيها بعدين لما نشرت عرضهم بالجريدة هههههههههه..اعاد السؤال وهو

عما يلعب بالبلاي ستيشن شو اسم الجريدة اللي قلتلي عليها قلت له الدومري قال لي اي منيح بكرا انت والثورة وتشرين والبعث بتتنافسوا .! قلت له حرام عليك..ليش انت بتعتبر تشرين والثورة والبعث جرايد؟؟؟ ومن باب المزح المخلوط بالجد قلت له هدول الجرايد حتى ماعادت الناس تستخدمهم حتى بتنضيف البللور …لأنه الحبر تبعها مغشوش وبيشحور الايدين…قام ضحك هوهوهو..هوهو هي… ارثمها ارثمها كاريكاتير..(انتهى)
(بالمناسبة في احدى المقابلات الصحفية حول نفس الموضوع تشرين والثورة والبعث)قلت هي الجرايد التلاتة الثورة والبعث وتشرين حتى بالحمامات ماعاد حدا استعملها لانها بتشحور الط…..ز! ولأجل الصدفة مرة شفت واحد فايت عالتواليت وبايده جريدة البعث وكانت المي مقطوعة وبايده جريده لاحظت بعد ماطلع أثر افتاتحية الجريدةمطبوعة على قفاه

نرجو متابعتنا على فيسبوك وتويتر بالضغط على الايقونتين
This entry was posted in الأدب والفن, ربيع سوريا. Bookmark the permalink.

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.