انس و اصالة : إضاءة برج خليفة لمدة ٥ دقايق هي 100 الف دولار

كتير ناس انتقدتهم مشان الفكرة الي عملوها
فعلياً تكلفة حركة اضاءة برج خليفة لمدة ٥ دقايق هي 100 الف دولار امريكي

كتير ناس انتقدتهم وانو لازم يروحوا يتبرعوا بدل هيك كب للمصاري

القصة كالتالي:
انس و اصالة عائلة صانعة محتوى على يوتيوب وعندهن على قناتهم اكتر من ٧ مليون مشترك وفيديوهاتهن البسيطة العائلية الي مافيها خدش حياء ولا اي قرف من الي عم نشوفو عند باقي الناس او شي خارج عن المألوف عليها ملايين المشاهدات

دخلهم من اليوتيوب شهرياً يقترب من ال 75 الف دولار اقل او اكتر ..

حبو يعملو فكرة فيديو وهي معرفة جنس المولود بإنو يستغلوا برج خليفة ويستاجروا الاضاءة تبعو لمدة 5 دقائق بتكلفة 95 الف دولار لحتى يضيئ بالازرق في حال كان المولود صبي او الزهري في حال كان الجنين بنت

كتير ناس حبت الفكرة وشجعوهم وفي ناس قالت الله يهنيهن من قلبهم
بس على الصعيد التاني عنا الناس الي بدا ترمي مشاكل الكرة الارضية ع اي حدا معو كم قرش زيادة

ف بلشت التعليقات ب انو:
“روحوا تبرعوا بهالمصاري اشرفلكن”
“معقول في عاقل بيحط هيك مبلغ”
“ليك التفاهة اديشهن تافهين”

عزيزي المعلق
انس و اصالة ساعدوا ناس كتير طلبت منهم وعلى طول بيساعدوا
ف لما بدهن يصرفوا مصاريهم على شي هنن حابينوا انت مو شغلك تمنعهن لانو بالاخير هي مصراتهم

تاني شي لا هنن مو تافهيين اذا حبو يعملو شي يضيف لحياتهن محبة وايجابية وبناء جو عائلي لمستقبل بعيد لما الولاد يكبروا ويشوفوا الفيديو

تالت و اهم شي الفيديو بغض النظر انو ايجابي هو كمان شغل لانو كمان رح يدر عليهن مالايقل عن ١٥ ل ٢٠ الف دولار اذا وصل ل ٧٠ مليون مشاهدة خلال ٢٨ يوم

ف صلوا عالنبي العدنان وكل واحد يصرف الي معو ع شي يحبوا وبالاخير الدنيا فاضية ومو حدا اخد معو شي سيد راسي

ملاحظة: يقال انو شركة الفن و اعمار هنن الممولين لهلمشروع

آدم كادورة

This entry was posted in الأدب والفن. Bookmark the permalink.

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.