جورج برشيني George Barshen
امرأة من دخان
مسافة أمان
هي: شو بتحب فيني
هو: بحب كل خلية فيكي …
هي: شفت أنك بتحبني بس جسد لهيك بيهمك خلايا جسمي..
هو: بحب كل خلية فيكي …كل خلية بجسدك وبروحك وفكرك…
هي: لي ما بتحكيني لكن غير صدفة ويمكن أيام تمرق ما تقلي صباح الخير…
هو: لأني بخاف عليكِ من كل شي ..من المستقبل…من البلد…من كل شي متعب…
بفيق الصبح بفتح عيوني بفتح عاسمك بدي ابعتلك بالدردشة صباحك سكر…بكتب وبمسح…بهرب …لأنه بدي ما تتعلقي ونغرق أكتر…بترك مسافة أمان…
هي: بتؤمن أنه في مسافة امان بالحب؟!.
هو: أي لأني بعرف كيف بحب وكيف بعبر…وبعرف أني أكتر شخص قادر يعبر عن الحب…لهيك بكتبلك وبمسح كل شي بكتبه …بكتب عورق وبخبيه بعيد عن الذاكرة…بعرف إذا حكيت وكتبت كل شي بحسه مارح تقدري تبعدي عني ولا رح تقدري تحبي بعدي… إذا افترقنا بيوم…ما بدي كون سبب تعاستك الأبدية لأني بعرف أنه ممكن كل الظروف توقف بوجهي وما أقدر كفي معك…
لهيك بكل يومي انت حاضرة معي وبقاوم رغبتي إني أحكيكِ
لاني بحبك اكتر …ببعد أكتر …
ببلد أكثر شي بيتميز فيه تاريخياً قتل الحب والمحبين…
لأني بحبك بترك مسافة أمان…
