الكاتبة السورية سلوى زكزك
رفعتوا راسنا، دعوة مجانية لكل من جاب مجموع كذا، برافو نجاح مشرف، والخ من هذيان تمجيد الأقوى..
حلو النجاح وحلوة العلامات..بس شو عن يلي عندن قدرة محدودة بالتعليم والدراسة واكيد هنن مميزين جدا بغير مجالات..شو عن يلي بتجي ذروة مراهقتن او نوبات الهلع بعز الفحص؟ شو عن المدارس يلي التعليم فيها زبابة بكل معنى الكلمة؟ شو عن ترهيب الأساتذة والمعلمات للطلاب؟وشو عن رهاب النجاح والفحص والدرس والعيلة والحارة والضيعة؟
شو عن ولاد تركوا المدرسة لمية سبب وماحدا انتبه او ماحدا فارقة معه؟شو عن أمهات بيترجوا ولادن بس يسمعوا الدروس والأم بتقرأ بلكي بتعلق شي معلومة لانو الطالب عنده صعوبات تعلم؟ شو عن البصم وبلع الكتب وتحويل البيوت لمعسكرات اعتقال 3شهور بالسنة؟ ويمكن كل سنة البكالوريا..
شو وشو وشو؟
مبروك للكل وخاصة للأضعف، ل يلي ماقدر يحط استاذ خصوصي،لكل من درس عاللد او عالشمعة، للبنات يلي اهلن عم يراهنوا عفشلهن وخايفين بناتن بعد النجاح يقولوا بدنا نكمل بالجامعة..للطلاب والطالبات يلي مامعن اجرة باص للمدرسة ولا اجرة مواصلات او تياب للجامعة..
الف مبروك للكل..حلو النجاح وحلوة العلامات وعامل أمان وقوة..
بس الأهم انو النجاح مو بس علامات، ومافي راس واطي لحتى تعليه علامات الولاد، والأحلى انو يخلص رهاب الفحص وتخلص الصور النمطية عن الناجحين والناجحات وانن فقط اصحاب/بات العلامات العالية..
حق العلامة مدري قديش..وبعرف في ولادة مادفعوا لأي استاذ.. بس القواعد كلها بدها إعادة اعتبار وأنسنة.
بعد كم يوم رح تبدأ معركة جديدة..معركة فرض خيارات العيلة والمجتمع عالطلاب وفرض معدلات لاتتناسب مع طبيعة الطلاب وإنما تعاملهم كسلم علامات وبس..ورح تبدأ معركة الربع علامة شو بتغير بتاريخ ومستقبل العيلة…
النجاح مو بس علامات..
النجاح ليس علامات ومعدل(احمل دكتوراه فيحق لي القول) النجاح العلمي محدود ومحصور بموضوع او اكثر انما النجاح الاكبر هو نتيجه للذكاء الاجتماعي والذكاء العاطفي والذكاء العملي. فالاجتماعي يوسع المحيط والمعارف والزبائن والعملي هو من يكتشف سريعا اسرار المهن والاعمال ويبدع فيها والعاطفي هو التفاعل الحقيقي مع الاخرين واشعارهم باهميتهم له وهكذا . اما النجاح العلمي فان ترافق مع احد الانواع المشروحه يحصل الابداع اما الذكاء الاول فقليل الاهميه. وهم مهم لحواديت الجدات والامهات المعقدات والفاشلات علي الاغلب.