المطرب #محرم_فؤاد … إنجازاته بدون حروب ونزاعات وسلب كراسي

المطرب محرم فؤاد …

المطرب محرم فؤاد …
اكثر انسان دلل نفسه
والمصيبة إنجازاته بدون حروب ونزاعات وسلب كراسي وإطاحة بالخط الاحمر..
كولو شلون دلل نفسة…..
……
اول زوجة له كانت مع الراقصة تحية كاريوكا …حين التقاها في منتصف عام ١٩٥٩، وانفصل عنها قبل أن تنهي السنة.
وكانت تحية كاريوكا في عز نجوميتها …وتشبه الكاهي بالگيمر ….
بعد ماطلگها !!!
اتزوج وحده لبنانية اسمها ماجده بيضون …وهاي كانت ملكة جمال لبنان …
بعدين اتزوج ميرفت امين مثل المشمش والعرموط اول وگعته بالسوك..
كانت تشبه الزلابية …
فاين الحظ طلگها !!
واتزوج صباح …صبوحه الكروانه .الشحرورة.
قطعة الحرير والنعومة…
بس مع هذا لم تتوقف المسيرة النضالية لهذا البطل …
طلگها واتزوج سهير رمزي رمز الانوثة والجمال
والدسومه!!
الي تشبه زند قوزي هرفي على التمن …
گول برد حيله!!.
ابد… لا…؟؟


رجع الى لبنان وتعرف على وحده اسمها جورجينا رزق …
التي كانت أستوها فايزة بلقب ملكة جمال الكون …
وغنالها (داري جمالك… دي العيون بصاصه …داري جمالك دي الرجال قناصة) وهي تتمركص كباله…
….
ولك يا استاذ محرم وين اكو قناص احسن منك بالعالم كله ….
زين بهيج حالة المفروض يگول يالله كافي …
اني حزت على وحش وبطل الجمال كله …
لكن البطل …
ابدا لم يوقف مسيرته الظافرة…
ترك الجمال اللبناني الفينيقي… واتجه للفرعونية….
ملكة الرقص الشعبي عايدة رياض اول بداية طريقها ….
كانت تشبه الحلقومة…
اتزوجها شهرين وطلگها
ورى فترة …گال لنفسه يالله حسن الختام …..
بس يا ختام
يا احلام…..وهو يمشي اتعثر بمذيعة حلوه اسمها منى هلال …. اتزوجها ….
ولولا يد القدر التي خطفته عام ٢٠٠٢… وملحك على ياسمين صبري كان ممكن يضمها للالبوم مالته…
…….
ويجيك بالتاريخ يدرسوك حمورابي وهتلر ونابليون..
عمي هذا محرم فؤاد مسوي سوايات!!!
لا هتلر و لا نابليون گدر يسويها ….
والاخ كاعد يسولفلي عن الشفافية والديمقراطية..
والقره وردي والتبليط والماء الخابط والكهرباء..
ولك يا طرگاعة
هاي الزلم الي تسمى حامض السماكي …
مع الاسف التاريخ لاينصف العظماء..
بس مكضيها كال ابو المولدة ورجعت الوطنية..ومكظيها منور وصح لسانك 😂😂
كل عام وانتم بالف خير وان شاء الله نلتقيكم العام القادم عسى ان يكون افضل من 2021 ولكم الف تحية
اخوكم الدكتور عمار الشمري

This entry was posted in الأدب والفن. Bookmark the permalink.

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.