الحب في زمن الحرب

Salwa Zakzak

الحب انك تاخدي شوندرات جارتك تسلقيهن عندك لانو ماعندا غاز..
الحب لما تقولي للست هدول وقية لحمة وتاخدي بس٠ ١٦٠ وانت قايلة للحام ساويهن بالفين..
الحب لما تخجلي من موبايلك المشحون وتطفيه لما تفوتي عالزيارة..
الحب لما تتحججي انو الكنزة صارت ضيقة عليك مشان تعطيها لست حبتها ومناسبة الها كتير..
الحب لما تكذبي وتقول أجاني فروجين كبار هدية وتطبخي عليهن هريسة وتطعمي عيلتين..
الحب لما تكوني عالبسطة وتدفعي للبياع وعالسكت حق كفوف لست ايديها متلجة وتمشي..
الحب لما بتلاقي ربطة خبز عباب البيت من ست مشغول بالها عابنتها يلي عم تولد…
الحب لما تمسحي دم ولد واقع بالطريق وتسندي ست مدودخة وطالعة لحالها من دار التوليد وتوقفيلا تكسي..
الحب لما كل يوم بتتصلي بست وحدانية وبتقلك تأخرت خمس دقايق..وبتكون ناطرتك من كل قلبا واذا ما اتصلت بتنقطع من الدنيا ويبسقع قلبها..


الحب لما تسال جارك عن رجلو وتقلو عندي ووكر فيني عيرك ياها…
الحب لما تنزل من السرفيس وتلحق ولد وقعت منو الالف ليرة الوحيدة ويلي رايح يشتري فيها حواصل وتضل نص ساعة بعدها لتامن سرفيس تاني.
الحب لما بتصرخ عالاب يلي عم يضرب ابنو وتقلو بتخسرو ياجار..
الحب لما اللقمة بتغصصك وبتقول سامحوني..هي قدرتي..
الحب لما العصافير يطلعوا بوجهك وانت مفكرن ما بيحسوا فيك وبيقلولك صباحك خير ودفا خيو ….خيتو

This entry was posted in ربيع سوريا, يوتيوب. Bookmark the permalink.

Leave a Reply

Your email address will not be published. Required fields are marked *

* Copy This Password *

* Type Or Paste Password Here *

This site uses Akismet to reduce spam. Learn how your comment data is processed.