Nabeela Koutrieh
(( ذكريات ))… اغنية ام كلثوم الرائعة
نحنا جيل معرض دمشق القديم !؟
الجيل يللي كان أحلى مشوار عنده مشوار المعرض
نحنا يللي كنا نحمل جواكيت الصوف بإيدنا مشان مانبرد بالليل وقت الرجعة ونحمي حالنا من رذاذ نوافير بردى الملونة
نحنا يللي كنا نفوت عالاجنحة وكل همنا نجمع كتالوجات وكتب وصور عن البلاد وصناعاتها ومالنا فهمانين شي عن المعروضات
نحنا يللي كانوا أهلنا يصورونا ادام النوافير والورود بكاميرات غليظة وكبيرة وورانا اعلام الدول يللي مشاركة بالمعرض
نحنا يللي كانت الفرحة ترتسم على وجوهنا وقت يفوتونا أهلنا على سوق البيع ليشترولنا البسكويت والشوكولا والبرايات الصينية والتحف الصينية من جناح البيع الصيني
نحنا يللي كنا نندهش وقت نفوت على سوق الصناعات اليدوية ونشوف كيف عم ينفخوا الزجاج يللي طالع من الفرن ليصير مزهرية أو زجاجة أركيلة .. ويطير عقلنا وقت يشترولنا أهلنا مزهرية صغيرة هلا انصنعت
نحنا يللي كنا نحب ناكل كنافة اباظة من على سطح سوق البيع مع انه كان غالي بتسعين قرش ونلعب زحليطة على رمبة مدخل المطعم يلي بيطل على السيف الدمشقي
نحنا يللي كنا ناكل من الأكشاك الدائرية كعكة مع قنينة حليب وقت نجوع ونتعب من التفتيلة ونسكرها بالاسكاية أمية على حليب أو شوكولاته
نحنا يللي كان يطير عقلنا وقت نفوت على قهوة الفنانين وقت عملوها بأحد الدورات ونشوف صلاح قصاص ويوسف حنا وهاشم قنوع وَعَبَد اللطيف فتحي ومنى واصف شخصيا ونحكي معهن كأنهن من عالم تاني
نحنا يللي كنا نحضر فيروز مع اهلنا بمسرح المعرض ونّام على رجلين أهلنا وقت تطول الحفلة وكل مايصفق الجمهور نصحى من اربعتنا
نحنا يللي كنا نخاف نضيع لأنه كل شوي نسمع من الهابرلوتات الخضرا المطاولة من إذاعة المعرض انه في ولد ضايع يرجى من أهله الحضور لأخذه
نحنا يللي كانوا اهلنا يوعدونا اذا سمعنا كلمتهن بالمعرض يطعمونا بالرجعة تسقية من المطعم الصحي أو شاورما من طلعة التجهيز
نحنا يللي عشنا المعرض القديم بهواه ونوافيره وألوانه ونهره وأكابريته ومسرحياته وجماله وكل شي حلو كان في دمشق
من أوراق دمشقي
من يحب ان يضيف اي لوحة …. من تلك الذكريات ….. فيا ليت ….. .
