العد والصف

استخدم الحلبيون في كلامهم عدة كلمات للتعبير عن عملية الشتم، معطين كلاً منها سمة خاصة بها. أورد في ما يلي بعضاً منها مقرونة بالأمثلة، مع الاعتذار عن مستوى الكلمات:
السباب: شتم دون استخدم كلمات بذيئة. قد يقول عزو شاتماً سمعو: شوف ولاك سمعو..هاراي عليك وعلى اللي سماك سمعو.
تلحيق: شتم على شكل ردة فعل على شتيمة أو تعيير من طرف أخر. قد يقول عزو شاتماً سمعو: لأ يا كلب لأ … بقى عمبتعيرني إني جدي كان بكجي (حارس ليلي) … روح اسآل نانتك كم مرة جاية بايسة إيد جدي منشان يشيل معا (معها) أبوك المشلوف بالصقاق سكران طيخة وخريان تحتو… روح اسآل عمك مين ستّر عليه أيام السفر برلك منشان ما يسحبوه عل عسكرية … روح اسآل عمتك مين اللي خلّصو لجوزا من تهمة السرقة…لأ يا هرا لأ… بس الحق مو عليك … الحق على اللي بحط إيدو بإيد أوباش متلكن.
العد والصف: شتم على شكل تعيير بالعيوب وغالباً ما تمارس من قبل النساء. قد تعيّر حميدة (نكاشة الببور) إمرأة أخيها (فسفسة المخدة) قائلة: ولك شخّاخة ما بقى تذوقي بقى… امبيرحة سمعتك عمبتقليلو لأخوي إني إمي عمبتدللني على حسابك وهيلكتك بالحوسة… إدعي لربك إني أخوي متحمّلك… انشالله محسبة إني نحنه مسدقينو لما بقول كل يوم يومين إني انكب تقلي المي عل فرشة وقت اللي بكون عمبنشر الفرشة عل دربزون… إي لاتتطمني كتير يا ام زعبوط المرقّع إذا صار لك في بيت أبوي أوضة ومربع… لأ يا بنت أم اجرين المشققة.. قومي فكّيه لهل ولد صارلو ساعة رملية عمببكي.
تحشيك: شتم مع استخدم كلمات بذيئة وغالباً ما تمارس من قبل الذكور. قد يقول عزو شاتماً سمعو: ولاك سمعو قال يوم الخميس بالسهرة جبت سيرة إني في نسوان من الحارة باشاياتن رقاق… يعني إذا رخيت دقنك ورجعت امك تلبس ملحفة بتصير انت وصي عل ناس؟ روح قللو لأبوك يبطل غش الفلاحين اللي بنزّلوا أرزاق عندو في الخان… روحوا استروا على هيزكن قبل ما تحطوا أعراض الناس بتمكن… هس أمك.. هس أختك يا ابن الهحبة… مرة الجاي بدي أقص لسانك إذا بتجيب سيرة نسوان الحارة…فهمت ولا لسة أفهمك أكتر.
الكفر: شتم لشخص من خلال شتم دين أو معبود ذلك الشخص.

About أحمد أديب شعار

الدكتور المهندس أحمد أديب شعار .. عاشق تراث حلب...له اهتمامات أدبية... سولزبري
This entry was posted in الأدب والفن. Bookmark the permalink.

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.