الله لا يوفقك يا أبن أنيسة بوظتلي سهرة راس السنة

امير داعش المعين من قبل الولي الفقيه بشار الاسد

أديب الأديب 2\1\2017 © مفكر حر

من أول ما بلشت ظاهرة الذئاب المنفردة بتنظيم داعش الإرهابي وتفجيرات الطائرات والنوادي بشمال اميركا, وانا كل ما بسافر بطيارة يتم تبديل مقعد الجالس جنبي برجل امن سري, وكل ما بروح ع سهرة بأي رستورانت راقي, بيكون رجلين امن بالطاولة المقابلة عم يراقبوني, خايفين كون لابس شي حزام ناسف بدي فجر نفسي فيهم, او بدي اسحب مسدسي واطلق عليهم الرصاص عشوائي لاقتل اكبر عدد ممكن منهن .. بس بسهرة راس السنة الأخيرة فقعت معي.. كنا متعودين لما نسهر بنادي راقي وندفع هداك المبلغ, نرجع بأخر السهرة معنا بنت عالم وناس جديدة نتعرف عليها بالسهرة ونقنعها بشخصيتنا وحديثنا وثقافتنا .. الخ,..  وكانت خطتي براس هالسنة اني اعمل نفس الشئ, وحجزت بالنادي من قبل بأسبوع… ولما وصلت ع النادي لقيت المحل يلي انا حاجزه على البيست مشغول من سيدتين, ميشان هيك طلب مني النادل بأدب ان اشغل المقعد يلي جنبهن .. انا قلت لحالي شو عليه.. وهيك بصير عندي فرصة افتح معهن حديث واتعرف عليهون .. واول ما حكيت معهن دغري سألتني من وين انت .. مبين من لهجتي اني غير مولود بأميركا.. فقلت لها انا من سوريا … فقالت لي كيفك تمام (بالعربي) … فقلت لها اف وكيف بتحكي عربي.. فقالت بس كم كلمة انا قمت بزيارة للبنان بمهمة لحضور مؤتمر حول (الربيع العربي) بالجامعة الاميركية, وبقيت ببيروت لمدة اسبوع.. المهم بأخر السهرة طلعنا لبرى ميشان ندخن سيكارة, واثناء الحديث سألتها شو دارسة انتي .. قالت لي بانها دارسة علم نفس.. وهذا اول دليل على انها رجل امن (جميع من جلسوا جانبي بالطيارة او بالرستورانت كانوا دارسين علم نفس وهو جزء من الدراسة الامنية الاكاديمية).. ولمن سألتها شو زرتي بلبنان قالت لي بأنها قامت جولة سياحة على معالم حزب الله؟؟؟ هون انا فهمت كلشي .. هي تعمل بالأمن ومختصة بالعرب السوريين واللبنانيين وخاصة تبعون حزب الله, وتم ارسالها الى لبنان لكي تتعلم كم شغلة بالعربي تستخدمهم بمهمتها بالتقرب من العرب لكي تحصل منهم على معلومات… وقتها تذكرت انه لما كنت ادرس بالجامعة كان لدي رفيقة لبنانية طبيبة من حزب الله وتجوزت ايضا واحد من حزب الله من يلي بتاجروا بتهريب الدخان من اميركا اللاتينية لشمال اميركا .. ومرة سكن بالشقة المقابلة لشقتي شب من حزب الله يتاجر بالسيارات المستعملة في افريقيا لصالح حزب الله … المهم المخبرة السرية عندما قلت لها بأني مسيحي ولست من حزب الله ولا اشكل اي خطر على احد .. عندها قررت الذهاب ولكن بعد فوات الأوان ينهاية سهرة راس السنة, وانا خسرت وقتي وضيعته مع مخبرة سرية بمهمة امنية ضدي … وهيك انا خسرت تطبيق وحدة تيجي معي ع البيت باخر السهرة.. ميشان هيك قلت الله لا يوفقك يا ابن الستين انيسة المجرم بشار الاسد خليتنا موضع شبهة ببلاد الغربة.. وخاصة اذا كنت عزابي… وانا اقصد بابن انيسة بشار الاسد هو ممثل عن جميع الطغاة العرب ولكن بما انني سوري, انا ادعو على بشار الأسد نيابة عن كل الزعماء العرب, فأن شخصيا لا اضع اي لوم على المسلمين او على الاسلام كما يفعل الاخرون, وانما انا الوم الطغاة العرب لانهم هم من يستغلون الدين لاهدافهم, وهم من يفتح المدارس والجامعات التي تدرس الارهاب.. فلو فتحوا بدلاً عنها جامعات مثل هارفارد فلن تخرج جامعاتنا عندها ارهابيين وانما مهندسين وعلماء ومخترعين… مرة ثانية: الله لا يوفقك يا ابن انيسة

About أديب الأديب

كاتب سوري ثائر ضد كل القيم والعادات والتقاليد الاجتماعية والاسرية الموروثة بالمجتمعات العربية الشرق اوسطية
This entry was posted in الأدب والفن, ربيع سوريا. Bookmark the permalink.

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.